SINGAPURA: Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi, nemuai gawa ke Opis Dagang enggau Dagang Temuai Sarawak di Singapura (STATOS), sehari tu.

Sama nyempulang seduai Sapit Menteri Pelajar, Inovasyen enggau Pemansang Penau Sarawak, Datuk Dr. Annuar Rapaee begulai enggau, Datin Dr. Haniza Zainal Abidin, sereta Direktor Opis Kandang Menua Sarawak, Opis Menteri Luar Nengeri Malaysia, Fenny Nuli.

Penemuai nya mega disempulang Pesuruhjaya Tinggi Malaysia ke Singapura, Dato’ Indera Dr. Azfar Mohamad Mustafar enggau bini, Datin Indera Che Norhayati Soib.

Penatai delegit Sarawak disambut Sapit Sekretari Perintah Sarawak (Operasyen), Datu Hii Chang Kee ti mega Direktor STATOS, sebedau sida dibai bejalai meda palan pemandang ti mandangka bemacham produk tebilang Sarawak mungkur pemakai, krafjari, asil betanam betupi enggau barang gaya idup.

Chairman STATOS, Tan Sri Mohamad Morshidi Abdul Ghani, bela nyempulang penemuai sekali tu seraya meri penerang pasal strategi negap rentayan dagang, nambah eksport enggau ngerembai makit produk lokal ke Singapura.

Penemuai gawa nya ukai semina negap pangku pengawa STATOS nyadi pintu penama produk Sarawak ke makit global aja, tang mandangka perintah nengeri semampai ransing negap kaul dagang enggau Singapura.-EDISI UKAS

Pemberita: Grace John Lee