3R Pugu Transformasyen Servis Perintah Sarawak Nuju 2030
KUCHING: Servis Perintah Sarawak patut negap budaya kereja nyulut nengah langkar kereja 3R iya nya Revisit, Rethink, Recharge nyadi pugu transformasyen nentuka nengeri tu nyapai status kandang menua maju enggau bepenatai pemisi tinggi manggai 2030.
Sekretari Perintah Sarawak, Datuk Amar Mohamad Abu Bakar Marzuki nyemetak madah ke rampa ekonomi global ti mar begunaka servis perintah ti sikar, responsive enggau bepuguka rayat.
“Timpuh nuju 2030 majak serekat, nya kebuah pemerani nyerenih baru chara kereja beguna endar,” ku iya.
Iya nibar ke jaku nya ba mua mayuh serimbai Hari Servis Perintah (HPA) Sarawak 2025 berambaika jaku “Leading with Excellence: Sarawak Civil Service’s Path Forward” di Borneo Convention Centre Kuching (BCCK), Hari Empat.
HPA Sarawak 2025 dipenyadika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
Datuk Amar Amar Mohamad Abu Bakar madah baru, orang gawa perintah meseti 'Revisit' iya nya nyerenih baru pengasi sistem, ngelala penekul enggau ngemanah proses.
'Rethink' nya ku iya, ngaga langkar strategi ti strategik agi enggau jauh timpai, seraya 'Recharge' nya negap kapasiti, nyadi tuai, ngena data sereta pemisi digital.
Iya mega madah, transformasyen ukai semina ngaul sistem enggau polisi aja, tang mega runding enggau budaya kereja.
Datuk Amar Mohamad Abu Bakar mega mantangka jaku ba pemesai guna ba raban gawa perintah mekuh inovasyen, seriris enggau utai diguna komuniti enggau pemegai saham ti majak mayuh leman.
“Kitai bisi mayuh pegawai pelilih, injinir, juruteknik, pengajar, staf pengerai enggau frontliners ti nyadi tiang sukung pemansang Sarawak. Sida tu ‘success stories’ kitai," ku iya.
Pengerami HPA 2025 mega ngemataka Premier Sarawak ngelanchar Bup Prinsip 3R Servis Perintah Sarawak, ti mupu pengawa pemadu manah, jerana pemujur sereta aplikasyen 3R ba pengawa negap atur gawa nengeri.
Datuk Amar Mohamad Abu Bakar nerangka bup nya mandang baka ni orang gawa perintah ba semua renggat udah mandangka prinsip 3R lebuh gawa, nyengkaum pemujur digitalisasyen, nambah kualiti servis, inovasyen ngadu projek enggau empas terus ngagai komuniti.
“Transformasyen kebendar ukai bepanggai ba sistem tauka dokumen, nya ba jari mensia. Maju Servis Perintah Sarawak, Maju Sarawak,” ku iya nyemetak.
Sama datai, Sapit Premier Sarawak, Datuk Amar Douglas Uggah Embas, Speaker Kunsil Nengeri Sarawak, Tan Sri Datuk Amar Asfia Awang Nasar, bala Menteri Kabinet, Tuai Sekretari Menua, Tan Sri Dato’ Sri Shamsul Azri Abu Bakar, Sapit Tuai Direktor Servis Perintah (Pemansang) ngari ke Tuai Direktor Servis Perintah, Datuk Dr. Mohd Bakhari Ismail, Sekretari Perintah Besai Sarawak (SUPS), Dato Ahmad Nadzri Mohd Hassan, bala tuai opis sereta orang gawa perintah nengeri enggau Perintah Besai.-EDISI UKAS
