KUCHING: Sarawak diatu nyingkang nuju administrasyen ‘lean government’ iya nya siti model atur pengawa ti efisien agi, jampat enggau enda mayuh leman.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, konsep administrasyen nya meri perati ngagai penau nelebaka diri enggau transformasyen digital enggau sikar ngatur belanja.
“Kededua pekara ulih nelebaka diri ba transformasyen digital enggau sikar ngatur belanja nya pekara ti pemadu dikeingat aku.
“Kitai benung nguing ngagai administrasyen ti ‘lean’ agi,” ku iya lebuh dirandau pengudah bejadi ngintu Hari Servis Perintah Sarawak 2025 di Palan Konvensyen Borneo Kuching (BCCK) kena Hari Empat.
Ku iya, servis perintah ti nemban enggau tan nya pugu besai ngemujurka agenda pemansang Sarawak.
Iya mega muji penau servis perintah Sarawak nelebaka diri enggau transformasyen digital nengeri.
Berebak enggau nya ku iya, polisi perintah begunaka kerejasama rat entara agensi nengeri enggau Perintah Besai, kelebih agi ba sektor beguna baka pelajar enggau pengerai.
“Ba sektor pelajar, mayuh pegawai servis perintah nengeri enggau Perintah Besai bekerejasama mutar isu sekula repuk. Pia mega ba sektor pengerai.
“Struktur kerrjasama tu ngasuh projek lanchar agi, seriris enggau polisi pemansang Sarawak,” ku iya.
Nambah ke nya, Premier Sarawak nerangka pengawa nyeraris gaji orang gawa perintah nengeri dibanding Perintah Besai nya pekara subjektif.
Iya nerang, perintah diatu naka ulih nentuka servis perintah terus sikar, responsif enggau nipakka transformasyen administrasyen nengeri.
“Standard gaji tu subjektif endar. Pekara pemadu beguna iya nya penyikar raban gawa ke servis perintah.
“Aku meri terima kasih ngagai servis perintah Sarawak enggau Perintah Besai ti nyadi raban efektif bejalaika polisi perintah,” tambah iya.
Iya mega madah, penau opis ngatur agih belanja ti berurun enggau ngasi disiplin ngasuh administrasyen nengeri tegap enggau efektif agi. -EDISI UKAS
