SCSDU Bulih Dua Anugerah Besai Serimbai HPA Sarawak 2025
KUCHING: Unit Digitalisasyen Servis Perintah (SCSDU) majak mandangka pengulih nyadi pemekuh transformasyen digital perintah nengeri lebuh mujur bulih dua anugerah besai serimbai Pengerami Ngintu Hari Servis Perintah (HPA) Sarawak 2025 ti diatur di Palan Konvensyen Borneo Kuching (BCCK), Hari Empat.
SCSDU diangkat nyadi penerima Anugerah AKPANS iya nya Pingat Emas sereta Anugerah Utama Premier Sarawak lalu mai pulai perais mata duit sepenyampau RM70,000.
Penyulut belipat tu sekali agi ngaku pengeransing sereta inovasyen raban SCSDU ba negap pengawa meri servis perintah bekenaka teknologi digital ti efisyen, responsif enggau mai pemaik.
Penyulut nya mega ngayanka pengeransing tegut unit nya ba nyaup agenda transformasyen digital Sarawak seriris enggau juluk ati Perintah Nengeri nempa ekonomi bepenatai pemisi tinggi bepuguka teknologi manggai 2030.
Kelimpah ari nya, Kaunsil Mengeri Kuching Utara (DBKU) udah mujur bulih Sijil Projek Reformasyen Ulah Birokrasi (RKB) nengah projek bepejuluk Digitalisasyen Penerit Adat: Notis Kompaun Diinsur Ari 30 Hari ngagai Sehari.
Pengawa meri basa tu ngayanka pengulih DBKU bejalaika reformasyen ti efektif dikena ngerumban proses nerit atur nengah transformasyen digital ke efisyen sereta responsif agi.-EDISI UKAS
