KUCHING: Anugerah Kualiti Servis Perintah Sarawak (AKPANS) 2025 nyadi entara batang pekara ti nyungkak pemanah atur perintah enggau inovasyen ba servis perintah bepun ari pemutus disebut serimbai Hari Servis Perintah (HPA) Sarawak 2025.
Direktor Unit Transformasyen enggau Inovasyen Sarawak (STIU), Superi Awang Said madah, pengawa nisih taun tu berati ke lima batang pekara iya nya tuai strategik, nyeraris operasyen, inovasyen enggau teknologi, pemujur pejalai sereta pemaik ngagai rayat.
Nitih ku iya, genap agensi meseti meri ripot kepenudi ti komprehensif, ditangkan enggau pengawa bejurai sereta proses verifikasyen pengamat enggau chara sistematik.
“Panel pemeresa ke dipadu ari mayuh penatai, nyengkaum atur perintah, atur strategik, pemansang organisasyen enggau transformasyen digital.
“Chara tu nentuka pengawa nisih ukai semina lurus tang mega nangkup guna servis perintah maya hari," ku iya Hari Empat tu tadi.
Superi mega madah, AKPANS 2025 mandangka pemansang ti nyengala ba pekara atur perintah, lebih agi ba nambah pengawa ngena data maya ngaga pemutus, ngena teknologi ngambi ngemanah proses servis perintah sereta pengulih nentu pemaik program engkeman agi.
Nambah ke jaku iya, iya madah, inisiatif 3R iya nya Revisit, Rethink, Recharge terus nyadi pelasar ba nambah manah idar nisih, lalu meransang agensi nisih pemujur proses, ngadu baru strategi ti enda engkeman sereta negap budaya kereja ti bisi kualiti.
Ku iya baru, segmen nyua anugerah ba HPA 2025 nyerangkung macham kategori ti ngayanka macham pengawa agensi perintah lalu rikod penyereta ke ngambi bagi mega betambah iya nya bisi 171 agensi nyengkaum Badan Berkanun Sarawak enggau Perintah Besai, Opis Bekuasa Menua, Agensi Perintah Besai, Unit ari baruh Opis Premier Sarawak, Opis Perintah, Administrasyen Bagi menua sereta Opis Menteri.
Pengawa ngambi bagi tu, negap ke agi tanggungpengawa AKPANS nyadi penyungkak produktiviti, inovasyen enggau atur perintah ti progresif ba sektor perintah nengeri.
Nya alai, iya nyimpulka kesemua penyulut AKPANS 2025 nyadi indikator ti nyengala dikena sektor perintah Sarawak besedia ngambi majak mansang ke mua dikena nyaup tunga kuing pemansang nengah Strategi Pemansang Pengudah COVID-19 (PCDS) 2030.-EDISI UKAS
