Tun Pehin Sri Dr Wan Junaidi Berandau Enggau Menteri Pemansang Rama & Ruang Bilik Singapura
SINGAPURA: Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar ngatur randau enggau Menteri Pemansang Rama enggau Ruang Bilik Singapura, Masagos Zulkifli Masagos Mohamad ba penemuai gawa iya ke republik nya, Hari Lima.
Masagos Zulkfili ke mega bakih lama Tun Pehin Sri Dr Wan Junaidi madah, kaul Singapura enggau Malaysia lebih agi Sarawak udah lama ditanggam lalu majak ditegap nengah randau baka tu.
Iya mega meri pengaga ati ngagai Tun Pehin Sri Dr Wan Junaidi ke udah dipadu nyadi Yang di-Pertua Negeri Sarawak sereta madah ke kaul bebakih sereta pemereti ati entara dua menua meruan tegap.
“Kaul kerejasama Malaysia lebih agi Sarawak enggau Singapura udah lama rat lalu ditegapka agi enggau kaul bakih kami,” ku iya.
Iya madah munyi nya maya dirandau Unit Komunikasi Awam Sarawak (UKAS) pengudah ngatur randau enggau Tun Pehin Sri Dr Wan Junaidi ditu, Hari Lima.
Berebak enggau nya, Masagos Zulkfili mega madah, taja Singapura menua moden, budaya enggau pengidup komuniti Melayu agi meruan di republik nya.
Kelimpah ari nya, kededua tukuh nya mega besilih penemu bekaul pemansang menua diri empu nyengkaum pengulih kuasa ari Sarawak sereta peluang kerejasama dudi hari.
Tun Pehin Sri Dr Wan Junaidi mega nyuaka tepa ngagai Masagos Zulkfili nyadi pengingat lalu dikena masa kaul bebakih seduai iya ke udah lama ditanggam.
Sama datai, Sapit Menteri Pelajar, Inovasyen enggau Pemansang Penau Sarawak, Datuk Dr Annuar Rapaee enggau Penolong Direktor Kanan, Kaul Antarabansa MSF, Sara Abdullah.-EDISI UKAS
