KUCHING: Unit Pengelikun enggau Penerit Adat Sarawak (UKPS) deka negap elemen pengelikun sereta pengawa besikap napi penusah ngenyit ba nengeri seriris enggau pesan ari Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ke ngasuh agensi nya besikap tumu ba menua.

Direktor UKPS Abdul Wahab Rahim madah, nya nyadi sebagi ari pekara ti dikemerat pengudah iya ngatur penemuai basa ngagai Premier Sarawak sereta bejuraika pemansang servis sereta tunga kuing agensi.

“Premier Sarawak minta UKPS ngambi negapka elemen pengelikun. Diatu, elemen pengelikun udah bisi, tang patut dikemanahka agi. Elemen pengelikun tu mega reti iya nyikap diri besikap napi pemar sereta penusah ngenyit.

“Dudi hari, kitai deka bejalaika pengawa ngidupka nyawa. Endang udah bisi operasyen ba tasik, tang ungkup bah enggau tanah tusur, kitai deka nisih sereta bejalaika iya. Premier Sarawak minta pekara tu ditegap,” ku iya ngagai pemberita pengudah ngatur penemuai basa di Kompleks Satria Pertiwi, Hari Lima.

Iya nerang, pengawa negap pengelikun nyengkaum nambah penyampau voluntia ke udah dilatih ba sitak penusah ngenyit nyadi lalu negap pengulih komuniti nyadi terabai menua maya napi penusah ngenyit.

Ku iya, UKPS deka ngelanchar tiga unit kapal baru 40 meter pemanjai, ti ulih beoperasyen seminggu dikena nambah manah pengelikun ba kandang endur strategik Sarawak.

Nitih ku iya, Premier Sarawak mega minta UKPS nempa digitalisasyen ba semua servis agensi, nyengkaum bekenaka teknologi moden dikena ngadu analisis data, meri gerah tumu, sereta nambah manah atur penanggul sereta pengelikun dikena negap pengelikun nengeri sereta mujurka operasyen agensi enggau komuniti ba napi penusah ngenyit.- EDISI UKAS

Pemberita: Nur Nabilla
Gambar: Muhammad Hanif Suhaimi