KUCHING: Subjek Jaku Inggeris ngerikod pemadu mayuh pas ba Peresa ‘Dual Language Programme Sarawak’ Primari 6 (UP-DLPS 6) enggau rikod 90.97 peratus.
Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn madah, pemutus peresa Jaku Inggeris mandangka tikas ti tegap sereta konsisten entara tiga subjek iya nya Matematik enggau Sains.
“Tu mandangka program landik Jaku Ingerris ke benung dipejalai diatu meri asil ti positif ke alai bisi 5,241 iku nembiak tauka 18.07 peratus chalun bulih gred A ba subjek nya,” ku iya.
Iya madah munyi nya ba aum media Penerang Pemutus Peresa UP-DLPS 6 ditu, Hari Lima.
Kelimpah ari nya, ku iya, subjek Sains ngerikod penyampau pas 84.71 peratus lalu Matematik ngerikod penyampau pas 61.01 peratus ba peresa nya.
“Matematik tetap nyadi subjek ke pemadu mar, lebih agi ba sekula menua pesisir enggau Sekula Suntuk Nembiak (SKM) lalu subjek tu begunaka intervensyen jampat, semina 1,734 iku nembiak tauka 5.98 peratus chalun bulih gred A ba subjek nya.
“Tikas penyulut Sains mega meransang, tang penyampau penyulut agi baruh, mandangka subjek nya patut ditegap agi chara belajar bepelasarka inkuiri. Semina 199 iku nembiak tauka 0.69 peratus bulih gred A ba subjek Sains,” ku iya baru.
Iya mega madah sekula mengeri agi nyulut ari sekula ba menua pesisir ba tiga subjek nya, taja pia, ku iya, UP-DLPS 6 nyadi perengka diagnostik dikena nisih pemujur program DLP Sarawak sereta nentu bidang ti patut dikemanah, ukai kena nembiak mekit pangan diri, sekula tauka Opis Pelajar Pelilih (PPD).
Nangkan nya, pengawa bejalaika intervensyen deka digaga ngambi negap pemanah tikas Matematik enggau Sains, lebih agi ba sekula menua pesisir nengah kerejasama Opis Pelajar Malaysia (MOE), Opis Pelajar Nengeri Sarawak (JPNS) enggau agensi bekaul.
Ke penemu mayuh, sesyen UPDLPS 6 2025 ngaul 1,050 sekula perintah, sekula bantu perintah enggau peribit, lalu sepenyampau 29,002 iku nembiak primari 6 peresa subjek Matematik enggau Jaku Inggeris, lalu 29,000 peresa subjek Sains enggau penyampau ke datai peresa semua bisi 99.46 peratus.
Sama datai ba aum media nya, Sapit Menteri Pelajar, Inovasyen enggau Pemansang Penau Sarawak Datuk Francis Harden Hollis, Sekretari Mendam Opis Menteri Pelajar, Inovasyen enggau Pemansang Penau Sarawak (MEITD) Datu Adana Jed, Direktor Yayasan Sarawak Datu Mohamad Junaidi Mohidin sereta Direktor JPNS Omar Mahli. -EDISI UKAS
