KUCHING: Sarawak majak ngenegap penuduk nyadi ‘Gateway to Borneo’ nengah ngatur pengawa agresif nempa penyulut diri ba sektor ekodagang temuai.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Sarawak deka terus mandangka pemanah menua tu ke ditapat temuai ari dalam enggau luar.
Dikena bejadika juluk ati nya iya madah, Sarawak udah ngena belanja sepenyampau RM129 juta ungkup pemansang enggau ngemaru infrastruktur dagang temuai.
“Agih belanja tu dikena ngadu Begunan Kunsil Nengeri (DUN) ke lama nyadi Palan Seni Pemerindang, pengawa ngaga baru Pegung Nyemerai Kaunsil Mengeri Kuching Selatan (MBKS) nyadi Taman Ai enggau hab Gastronomi Mengeri Kreatif UNESCO, projek Dagang Temuai Bakau Sadong Jaya sereta pengawa ngaga muzium,” ku iya.
Iya madah munyi nya maya bejuraika Rang Undang-Undang (RUU) Bekal (2026) 2025 ba Aum Ketiga Penggal Keempat DUN Sarawak Ke-19, ditu, Hari Satu.
Dikena ngenegap penatai Sarawak ba makit besai sereta matak dagang temuai, Datuk Patinggi Abang Zohari nerang, perintah deka ngungkupka RM194 juta ngagai Opis Menteri Dagang Temuai, Industri Kreatif enggau Seni Pemerindang (MTCP) ungkup operasyen sereta pejalai program makit enggau ngelaku dagang temuai.
“Agih belanja tu nyengkaum RM45 juta dikena ngatur program enggau pengerami ti ngayanka penyelai budaya Sarawak, RM106 juta geran ungkup Sarawak Tourism Board (STB), Business Events Sarawak, Kaunsil Seni Sarawak (MSS) enggau Kaunsil Kraf Sarawak, RM10 juta ungkup melanja program budaya enggau pesaka, RM5 juta ungkup geran pansik, sereta RM1 juta ungkup geran bukai bekaul dagang temuai,” ku iya nerang baru.
Ba pekara bekaul, Menteri Pekara Wang enggau Ekonomi Baru Sarawak nya madah, sepenyampau RM24 juta diungkup ngagai Sarawak Forestry Corporation (SFC) dikena ngaga projek strategik baka pengawa ngatur Taman Negara Gunung Mulu, pengawa ngaga baru pintu tama Taman Negara Bako, ngaga Nature Discovery Centre di Piasau Nature Reserve sereta sistem latih enggau atur malin temuai.
Ku iya, tu ngelai pengeransing Sarawak ke deka ngintu sereta ngelaku palan ikonik baka Gunung Mulu enggau Niah ke diaku UNESCO.
Kelimpah ari nya, iya madah, pengawa ngelanchar AirBorneo deka nyadi penyungkak baru sereta beguna dikena ngemanah kaul sereta negap nama Sarawak nyadi pintu penama ke Borneo ba panggau ASEAN enggau antarabansa. -EDISI UKAS
