KUCHING: Perintah Sarawak ngenegap pengeransing nambah manah akses perengka guna rayat nengah agih belanja ngelui RM1 bilion ungkup bekal ai beresi enggau karan lebih agi ba kandang menua pesisir.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, perintah ngemerat pengawa nentuka perengka guna majak disungkak nengah chara ti komprehensif dikena nipak guna rayat di selampur nengeri.

Nitih ku iya, Sarawak diatu ngerikod 86 peratus bungkur bekal ai ke alai 100 peratus di kandang mengeri lalu 70 peratus ba menua pesisir.

"Seriris enggau Sarawak Water Supply Master Plan, perintah meri perati ba pengawa ngerembai akses ngagai kandang menua tusah datai grid nengah inisiatif Water Supply Grid enggau Sistem Alternatif Bekal Ai Sarawak (SAWAS).

"Dikena ngaga macham projek strategik nya, RM409 juta diungkupka ba 2026 nyengkaum Loji Meresi Ai Kandang Menua Engkilili, Sri Aman, pengawa nyeleti Loji Meresi Ai Salim, Sibu.

"Nangkan nya, projek Bekal Ai Kandang Menua Serian Renggat Kedua, pengawa nyeleti Loji Meresi Ai No.4 Batu Kitang, Loji Meresi Ai Mukah, pengawa ngaga paip ungkup Program Darul Hana enggau Loji Bekal Ai Kandang Menua Lundu/Sematan," ku iya.

Iya madah munyi nya maya bejuraika Rang Undang-Undang (RUU) Bekal (2026) 2025 ba Aum Ketiga Penggal Keempat Kunsil Nengeri (DUN) Sarawak Ke-19 ditu, Hari Satu.

Nambah ke jaku iya, Premier Sarawak madah, RM402 juta diungkup nengah Alternative Funding dikena ngatur Sarawak Water Supply Grid Program for Stressed Areas sereta program nyeleti enggau nganti paip lama.

Ku iya nerang, program ai pechuma ti meri subsidi RM5 keterubah bil ai domestik kenyau 2020 deka ditandu ba taun 2026 nengah RM21 juta agih belanja. - EDISI UKAS

Pemberita: Muller Asen
Gambar: Muhammad Rais Sanusi & Jaed Tepus