KUCHING: Sarawak ngungkupka RM46 juta ba Bajet 2026 dikena ngerumban penembu projek karan di selampur nengeri.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, naka tu bungkur karan menua pesisir udah bisi 98.6 peratus.

“Sepenyampau RM46 juta diagih ba taun 2026 ungkup projek karan menua pesisir baka Additional and Late Application Fund (ALAF), pengawa nyambung genturung pendiau enggau rumah panjai SARES ngagai grid ke semak.

“Nangkan nya, pengawa nyilih bateri enggau komponen sistem solar bediri kediri sereta pengawa nyeleti bekal karan ba Sitak Samarahan,” ku iya.

Iya madah munyi nya maya bejuraika Rang Undang-Undang (RUU) Bekal (2026) 2025 ba Aum Ketiga Penggal Keempat Kunsil Nengeri (DUN) Sarawak Ke-19 ditu, Hari Satu.

Berebak enggau nya, pengeransing ngadu bungkur karan disungkak ngena RM153 juta nengah Alternative Funding dikena ngadu program Rural Electrification Scheme (RES) ba taun baru.-EDISI UKAS

Pemberita: Muller Asen
Gambar: Muhammad Rais Sanusi & Jaed Tepus