KUCHING: Perintah Sarawak majak mandangka penyiru ngagai rayat nengah pengawa nyendiaka macham inisiatif ti meri pemaik ngagai raban indai, anak mit, nembiak mit enggau raban begunaka bantu.

Nitih ku Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, RM20 juta deka diungkup nengah 'Endowment Fund Sarawak' ba taun 2026, dikena nentuka tiap iku anak mit ngepunka pengidup enggau belanja ti tegap.

Kelimpah ari nya, ku iya, Program Bantu Indai Beranak nerima belanja RM5 juta dikena ngelempungka tating raban indai ke baru beranak.

Iya madah munyi nya maya bejuraika Rang Undang-Undang (RUU) Bekal (2026) 2025 ba Aum Ketiga Penggal Keempat Kunsil Nengeri (DUN) Sarawak Ke-19, ditu, Hari Satu.

Maya nya mega, Datuk Patinggi Abang Zohari bela madahka sukung ngagai nembiak mit begunaka bantu khas nengah One-Stop Early Intervention Centre (OSEIC).

"Ba taun 2026, bisi RM3.9 juta diungkup dikena ngenegap pengawa OSEIC di Kuching, Dalat enggau Miri," ku iya.

Nambah ke jaku iya, iya madah, sepenyampau RM55.8 juta mega diungkup ngagai program ngintu pengelantang bukai ari baruh pengawa ngintu rama, nyengkaum bantu ngagai raban nembiak, nembiak mit, Orang Timpang Pendiau (OKU) ke enda ulih gawa sereta orang tasah penusah ngenyit.- EDISI UKAS