SBC, DVS Besaup Ngaga Produk Anthelmintik Dikena Jelu Tupi
KUCHING: Palan Biodiversiti Sarawak (SBC) enggau Opis Servis Veterinar (DVS) besaup ngaga produk anthelmintik ke dikena jelu tupi nengah siti Sempekat Pemereti Ati (MoU).
Menteri Pelajar, Inovasyen enggau Pemansang Penau Sarawak Dato Sri Roland Sagah Wee Inn madah, kerejasama tu ngelai pengeransing Sarawak ngemansangka bioekonomi moden bepelasarka Sains seraya nyamin pengelikun pemakai di nengeri tu.
Ku iya, tu bela tau ngurangka kelalu bepanggai ba ubat sintetik import lalu meransang inovasyen ti bekenaka penatai ari pengeraja asal enggau penemu ari menua tu empu.
"Maya orang nupi jelu napi penanggul ketegal parasit, inisiatif tu deka mai Sarawak nyulut ba pengawa nyendiaka chara mutar ti bela ulih nyungkak produktiviti sereta nyaup sistem agro-pemakai ngambika lebih agi puh," ku iya.
Iya nerangka pekara nya ba aum media sepengudah ngemataka pengawa besilih MoU antara SBC ti diarika Sekretari Mendam Opis Menteri Pelajar, Inovasyen enggau Pemansang Penau Sarawak (MEITD) Datu Adana Jed enggau Direktor DVS Sarawak Datu Dr Adrian Susin Ambud ditu, Hari Dua.
Bela datai, Menteri Industri Pemakai enggau Pemansang Kandang Menua Sarawak Dato Sri Dr Stephen Rundi Utom, Sapit Menteri MEITD Datuk Francis Harden Hollis enggau Tuai Pegawai Eksekutif SBC Dato Dr Yeo Tiong Chia.
Nerang enggau silik, Dato Sri Roland Sagah madah, pengawa mansik nya deka begunaka saup ari mensia mayuh lebih agi bansa Bidayuh ti mekal utai tumbuh baka Sipudun tauka nama saintifik iya, Picria fel-terrae.
Maya nya Dato Sri Dr Stephen Rundi madah, utai tumbuh nya semina bisi di Asia Tenggara aja lalu tu meri pengelebih ngagai Sarawak nyual produk ari asil pansik nyema mujur, lebih agi ngagai menua pengeluar asil nupi jelu baka New Zealand.
"Sarawak kaya ba biodiversiti lalu kitai bisi ati deka beambi ulih ari pengelebih tu alai SBC megai tanggungpengawa besai ngemansangka pengawa tu," ku iya madah.
Ba pekara bekaul, ubah ba Ordinan Sarawak Biodiversiti udah meri kuasa ngagai SBC nyengkaum ba pengawa bekaul komersial sereta numbuh kompeni subsidiari dikena mai asil pansik ngagai makit luar. -EDISI UKAS
