Opis Penyangkai Kapal Sarawak Disadang Ngepunka Operasyen Suku Kedua 2026
KUCHING: Opis Penyangkai Kapal Sarawak disadang deka ngepunka operasyen ba suku kedua taun 2026.
Sapit Menteri Infrastruktur enggau Pemansang Penyangkai Kapal, Datuk Majang Renggi madah, nitih ke Sarawak Ports Authority Ordinance 2024, semua opis penyangkai kapal di Sarawak diseraris nengah chara nyengulai ba baruh siti kaunsil ngatur tunggal iya nya Opis Penyangkai Kapal Sarawak.
"Maya tu, Perintah Sarawak nengah Opis Menteri Infrastruktur enggau Pemansang Penyangkai Kapal udah numbuh Task Force ke megai tanggungpengawa nyendia langkar atur dikena bejalaika pengawa Opis Penyangkai Kapal Sarawak,” ku iya.
Iya madah munyi nya maya nimbal tanya Kaban Kunsil Nengeri (ADUN) Batu Danau, Dato Paulus Palu Gumbang, ba Aum Ketiga Penggal Keempat Kunsil Nengeri (DUN) Sarawak Ke-19, Hari Tiga.
Bekaul tanya proses ngempung atur opis penyangkai kapal ba baruh Opis Penyangkai Kapal Sarawak, iya madah, proses nyeraris tu deka digaga nengah tiga renggat, iya nya renggat interim, ngubah nyadi korporat enggau peribit.
Ba renggat interim, ku iya, proses tu ngaul pengawa mindah atur ari Opis Penyangkai Kapal ke diatu nggai Opis Penyangkai Kapal Sarawak baka ba Ordinan Penyangkai Kapal Sarawak, 2024.
"Lalu renggat nempa nyadi korporat deka ngaul pengawa nukar status opis penyangkai kapal ari ’badan berkanun’ ngagai kompeni empu perintah nengah akta kompeni.
"Tuju nya ngambi atur enggau operasyen penyangkai kapal diatur bepuguka makit enggau meri perati ngagai penyikar, pekara wang ti tegap enggau akauntabiliti sereta besedia ungkup proses meribit ba dudi hari,” ku iya nerang baru.
Nyaut bekaul baikka staf opis penyangkai kapal ke bisi diatu diambi nyadi staf ba dalam Opis Penyangkai Kapal Sarawak, iya madah, staf opis penyangkai kapal deka disediaka pengawa baikka dalam opis nya tauka ba entiti korporat penyangkai kapal baru nitih ke pematut bepelasarka prinsip “no less favourable”.-EDISI UKAS
