KUCHING: Sarawak deka nyadi tuai rumah ngatur program digital global keterubah Malaysia sepengudah Perintah Besai nengah Opis Menteri Digital enggau Perintah Sarawak besetuju ngatur Borneo Animation & Games Festival (BAGF) kena Ogos 2026.

Menteri Digital Malaysia Gobind Singh madah, Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg udah besetuju numbuh komiti begulai, Perintah Sarawak enggau Opis Menteri Digital nengah Kaunsil Ekonomi Digital Malaysia (MDEC) dikena nyikap diri ngatur program nya.

“Kitai deka mai program global ke Sarawak kena Ogos 2026, enti Premier Sarawak udah besetuju, komiti tu deka ngadu perambu silik sebedau aku bejuraika ngagai Kabinet ba suku keterubah taun baru,” ku iya maya dirandau media pengudah ngatur penemuai basa ngagai Premier Sarawak, Hari Tiga.

Sama datai ba penemuai basa nya, Menteri Utiliti enggau Telekomunikasyen Sarawak, Dato Sri Julaihi Narawi, Sekretari Perintah Nengeri Sarawak, Datuk Amar Mohamad Abu Bakar Marzuki, Sapit Menteri Digital Malaysia, Datuk Wilson Ugak Kumbong sereta deligit ari Opis Menteri Digital Malaysia.

BAGF 2026 deka nyadi program betikas antarabansa lalu sebagi ari pengeransing nempa Sarawak nyadi ‘Heart of Southeast Asia’s Digital Creative Industry’.

Pengerami lima hari nya ngembuan juluk ati matak 300 deligit industri ngambi bagi enggau 40 peratus pengari ari antarabansa, ngaul lebih 200 penyereta pemandang ari dalam enggau menua bukai sereta bela matak penyereta ari industri besai baka Disney, DreamWorks, Netflix, Sony Pictures Animation, Konami enggau Nintendo.

Program nya ngemerat pemansang dagang nengah Business Matching, program rentayan industri enggau platform ‘Elevator Pitch’ dikena ngerandang peluang dagang ngagai penau menua.

Kelimpah ari nya, Gobind Singh mega madah, BAGF 2026 deka nyungkak agenda nasional, nyengkaum pejalai AI Nation 2030, ti begunaka pengawa nyeraris entara Perintah Besai, Perintah Nengeri enggau PBT.

Pengawa ngatur BAGF 2026 deka nempa Sarawak nyadi hab baru industri animasi, main digital enggau teknologi kreatif Asia Tenggara.-EDISI UKAS

Pemberita : Maryam Zanariah Ibrahim
Gambar : Jaed Tepus