KUCHING: Sarawak mengkang ngembuan hak meresa pekara wang tiap lima taun sekali nengah Artikel 112D Konstitusyen Perintah Besai lalu ngenegap penuduk nengeri tu nagih belanja ari Perintah Besai.

Sapit Menteri di Opis Premier Sarawak (Undang-Undang, MA63 enggau Kaul Nengeri enggau Perintah Besai), Datuk Sharifah Hasidah Sayeed Aman Ghazali madah, taja nadai penerang ti nyengala ba Konstitusyen Perintah Besai ke meri Sarawak hak nagih 40 peratus asil baka Sabah, nengeri tu meruan dijaga nengah mekanisme meresa pekara wang nitih renggat ti patut digaga tiap lima taun sekali nengah Artikel 112D.

Nitih ku iya, pemutus Kort Tinggi di Kota Kinabalu bekaul hak Sabah mai prinsip, pematut Perintah Besai meri belanja ngagai Sabah enggau Sarawak baka ke diletak ba Konstitusyen.

“Pengawa meresa tu meseti digaga enggau pengelurus, engkeman ba maya iya sereta bepelasarka formula ti nyengala enggau konsisten. Prinsip tu besai reti dikena nentuka Sarawak nerima nama ke patut nitih penuduk iya ba Konstitusyen Malaysia,” ku iya.

Iya madah munyi nya maya nimbal tanya Kaban Kunsil Nengeri (ADUN) Katibas, Lidam Assan ba Aum Ketiga Penggal Keempat Kunsil Nengeri (DUN) Sarawak Ke-19 Hari Tiga.

Nambah ke jaku iya, iya madah, randau bekaul Geran Khas entara Perintah Sarawak enggau Perintah Besai mujur digaga nengah randau teknikal enggau konsultasyen.

Ba pekara nya, Datuk Sharifah Hasidah madah, Perintah Besai udah besetuju nambah Geran Khas Sarawak ari RM300 juta ba 2024 ngagai RM600 juta belabuh 2025 ungkup timpuh lima taun.

Ku iya, taja pengawa nambah nya endang dikelalu, Perintah Sarawak meruan ransing negika formula ti lurus, komprehensif enggau meri jamin mayar timpuh panjai setipak enggau hak nengeri nengah MA63 enggau Konstitusyen Perintah Besai.-EDISI UKAS

Pemberita: Gabriel Rommy
Gambar: Ameerul Syafiq