KUCHING: Kaban Kunsil Nengeri (ADUN) Opar, Billy Sujang ngarap sebagi ari belanja ungkup pemansang sistem parit enggau entali ai umai ba Sarawak bela diungkupka ngagai sitak DUN Opar.

Nitih ku iya, bisi tujuh umai ba sitak iya udah ditentu Agensi Pengatur Pemansang Greater Kuching (GKCDA) begunaka pengawa nyeleti lebih agi sistem parit enggau entali ai.

“Umai di Kampung Jangkar sebagi ari umai pemadu besai enggau semak 900 hektar pemesai lalu aku ngarap amat enti nyema Opis Menteri ke bekaul enggau Opis Pemansang Tanah Sarawak (SLDB) ulih nyendiaka belanja ti chukup dikena bumai ba kandang endur ti besai ngambi ulih nangkup guna beras Sarawak.

“Opis Entali Ai enggau Parit (DID) Sarawak benung ngaga pansik sereta langkar umai tu,” ku iya.

Iya madah munyi nya maya bejuraika Rang Undang-Undang (RUU) Bekal (2026), 2025 ba Aum Ketiga Penggal Keempat Kunsil Nengeri (DUN) Sarawak Ke-19, ditu, Hari Empat.

Kelimpah ari nya, ku iya, enam agi umai iya nya di Kampung Jugan, Kampung Tebaro, Kampung Sedaing, Kampung Rukam, Kampung Sebako enggau Kampung Biawak mega patut dikemanahka.

“Aku ngarap agensi pengatur ungkup projek tu ulih ngerumban pengawa ngelangkar sereta tender semua projek tu laban pengawa ngasil beras ti chukup besai amat reti dikena nyapai jamin pemakai di Sarawak,” ku iya.

Ke penemu mayuh, Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg maya bejuraika RUU Bekal (2026), 2025 Hari Satu tu tadi nerangka RM20.4 juta ari bajet Sarawak diungkup ngagai infrastruktur parit enggau entali ai umai. -EDISI UKAS

Pemberita: Jonnie Kiew
Gambar: Jaed Tepus