Lumba SEA 2027: Sarawak Ngatur 17 Lumba Di Kuching
KUCHING: Bisi 17 bansa lumba deka diatur di Kuching serimbai Lumba SEA 2027, ngira pengulih infrastruktur, perengka guna ke endang mengkang bisi sereta pengulih logistik ti nitih standard antarabansa.
Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu madah, pengawa milih Kuching nyadi palan ngatur pengerami besai nya digaga Sekretariat Malaysia SEA Games (MASOC) pengudah pengawa nisih perengka guna ke mengkang digaga enggau komprehensif.
"Pemutus tu ngira sistem pengangkut, kapasiti endur diau sereta infrastruktur lumba ke ulih dikena di Kuching.
"Pengawa ngemanah deka digaga ba sekeda fasiliti dikena nentuka nitih spesifikasyen antarabansa," ku iya maya nimbal tanya Kaban Kunsil Nengeri (ADUN) Meradong, Datuk Ding Kuong Hiing ba Aum Ketiga Penggal Keempat Kunsil Nengeri (DUN) Sarawak Ke-19, Hari Empat.
Iya madah, taja lumba bepalan di Kuching, ba menua bukai bela diberi peluang endur ngatur pengawa belanda mai Obor Sukan SEA 2027 di selampur nengeri.
Berebak enggau nya, Datuk Gerald madah, pengawa ngatur pengerami nya mega nyaup pejalai projek strategik nengeri manggai 2027 nyengkaum Sistem Transit Aliran Automatik (ART) sereta kompeni penerebai bilun enggi nengeri, AirBorneo.-EDISI UKAS
