KUCHING: Palan Ngenduh Orang Kampar (TTG) di Bintulu diatu ba renggat kepenudi tembu sebedau berengkah dibuka pun taun 2026.
Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah madah, TTG Bintulu ulih alai 30 iku orang kampar, 18 lelaki enggau 12 indu.
"Tu dikena kitai nyaup raban orang kampar sereta nyungkak pengelantang rayat," ku iya.
Iya madah munyi nya maya nimbal tanya Kaban Kunsil Nengeri (ADUN) Tanjong Batu, Johnny Pang Leong Ming ba Aum Ketiga Penggal Keempat Kunsil Nengeri (DUN) Sarawak Ke-19, Hari Lima.
Nitih ku iya, palan nya deka nyendiaka macham servis nyengkaum kaunseling, latih pengelandik, ngiga pengawa puang dikena mantu orang kampar sereta ngaul diri enggau mensia mayuh.
Ku iya nerang, pengeransing tu digaga enggau kerejasama agensi perintah, gerempung ukai dikuasa perintah (NGO), enggau sektor peribit, ke nyadi bakih strategik ba ngemujurka program tu.-EDISI UKAS
Pemberita: Betrice Britney Dee
Gambar: Hazrin Sunaini
