KUCHING: Sarawak ngerikod penatai 4.01 juta temuai enggau penyampau resit dagang temuai manggai RM10.2 bilion naka Oktober taun tu.

Menteri Dagang Temuai, Industri Kreatif enggau Seni Pemerindang Dato Sri Abdul Karim Rahman Hamzah ngarap juluk ati nerima penatai lima juta temuai agi ulih dijapai alai taun tu semina bisi kurang dua bulan agi.

"Reti iya, November enggau Disember, abis nadai 450,000 temuai datai ninting bulan.

"Bulan sebedau tu suah ngerikod urung 420,000 ngagai 430,000 temuai," ku iya ba aum media SIFMA 6.0 ba Kunsil Nengeri (DUN) Sarawak ditu, Hari Empat.

Taja pia ku iya, juluk ati lima juta temuai nya deka dibai taun siti agi nyema enda ulih nyadi taun tu lebih agi nengeri tu bisi kompeni Penerebai Bilun AirBorneo ke disadang nyungkakka industri dagang temuai nengeri.

Ku iya, program besai baka Konsert Andmesh Kamaleng (28 November), Konsert Fenomena Samurai ke dirichah Search enggau XPDC (13 Disember) enggau Pengerami Nyambut Taun Baru 2026 ujung taun tu disadang matak mayuh agi temuai nyengkaum ari menua bukai.

Maya nya, iya mega madah, resit dagang temuai udah manggai RM10.221 bilion, mandang bala temuai mayuh mansut belanja.

"Tu mayuh mai penguntung ngagai industri hotel, restoran enggau orang dagang menua tu empu," pia ku iya. -EDISI UKAS