KUCHING: Sarawak begunaka mayuh agi ‘imaginasyen’ rebak biak dikena nyaup nengeri tu nyungkak industri kreatif.

Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan madah, nengeri tu deka nyadi palan alai rebak biak bisi peluang ngerembaika penemu lalu ngena ‘imaginasyen’ ba industri besai.

“Baik ke kita ditempa nyadi nama, nempa dunya imersif, ngadu animasi tauka ngemansang peneleba interaktif, kita benung ngelangkar chara mensia meda, ngasai sereta bejaku.

“Kita nyangka bedau nemu diatu, tang idea ke ditengkebang kita sehari tu ulih nyungkak rayat, meri inspirasyen ngagai menua, lalu nyangka mega datai ngagai selampur dunya,” ku iya.

Iya madah munyi nya maya bejaku ba program bejadi Swinburne Industry X-Day, di Universiti Teknologi Swinburne Kampus Sarawak, ditu, Hari Empat.

Nambah ke jaku iya, iya madah baru, industri kreatif Sarawak benung mansang sereta begunaka mayuh agi pereka biak, pencherita, inovator enggau penau bukai ba industri kreatif ngambi nyaup serta ngaul diri sida ba industri tu.

“Raban nembiak enda ibuh takut nempa ‘imiganisyen’ enggau berani lalu enda ibuh malu madahka idea kita laban tiap pejalai kreatif ti manah bepun ba alai kita bediri sehari tu,” ku iya baru.

Berebak enggau nya, iya muji pengeransing Universiti Teknologi Swinburne Kampus Sarawak ti ngembing nembiak ba belajar ti ngaul pemekuh industri.

“Tu mih jalai kitai mansang, ukai semina ngajar pengelandik, tang ngaul nembiak enggau dunya ti begunaka sida,” ku iya. -EDISI UKAS