KUALA LUMPUR: Yang di-Pertua Negeri Sarawak Tun Pehin Sri Dr Wan Junaidi Tuanku Jaafar diberi Honorary Doctorate of Management ari Universiti Tun Abdul Razak (UNIRAZAK) serimbai Istiadat Konvokesyen UNIRAZAK Ke-24 ti diatur di Dewan Merdeka, Pusat Dagangan Dunia Kuala Lumpur (WTCKL) kena Hari Enam.

Iya datai ba WTCKL pukul 8.05 pagi disempulang bini, Toh Puan Datuk Patinggi Fauziah Mohd Sanusi sereta sida sebilik.

Lebuh datai dia, deligit Yang di-Pertua Negeri Sarawak diambat Menteri Kereja Raya Malaysia ti mega Menteri Pemansang Orang Dagang enggau Gerempung Kerejasama, Dato Sri Alexander Nanta Linggi, Pro-Canselor UNIRAZAK Dato’ Mohamed Nizam Tun Abdul Razak, Tuai Pegawai Eksekutif UNIRAZAK Amil Izham Hamzah sereta temuai dipebasa bukai.

Lebuh bejaku pengudah nerima anugerah nya, Tun Pehin Sri Dr Wan Junaidi berasai gaga nerima basa tu.

Iya mega madah, tu ukai semina ngaku iya empu tang mega ngaku servis, integriti sereta pengeran ngiga penemu ti nyadi pugu pejalai pengidup.

“Pengawa nyadi tuai ti nemban ukai semina bepelasarka pangku pengawa tang mega bepuguka pemereti ati enggau integriti, penyiru enggau pemintar nyadi pugu pengandal rayat,” ku iya.

Tun Pehin Sri Dr Wan Junaidi mega ngelalau bala graduet terus gawa ke komuniti enggau menua enggau lurus ati, ngetuai enggau manah sereta ngena penemu nyadi kereban nempa menua ti asi, besemekih enggau menyana agi.

Iya mega meri tabi puji ngagai bala graduet UNIRAZAK ungkup taun 2025 ti nyadi cheremin rambai jaku konvokesyen, 'Breaking Through' mandang peneguh, disiplin enggau penetap napi pemar sereta ubah global.

Yang di-Pertua Negeri Sarawak meri terima kasih ngagai UNIRAZAK nyadi institusyen pelajar ti keran negap pengawa belajar inklusif kelebih agi ngagai sida ti nengah jalai pelajar ukai konvensional sereta ngangkat konsep belajar seumur idup nyadi penyungkak pemansang mensia enggau menua. - EDISI UKAS

Gambar: Astana Negeri Sarawak