PADAWAN: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg muji inisiatif industri simen gadung ti digaga Cahya Mata Sarawak (CMS) Berhad ke ukai semina nyaup agenda pemansang meruan Sarawak, tang seriris enggau pengeransing global ngurangka pemansut karbon.

Nitih ku iya, inisitaif berani CMS Berhad ngena teda nyadi sebagi ari penatai kuasa sereta ngasilka simen ti nyaga rampa menua mandangka pengeransing kompeni nya ba pengawa bekenaka teknologi gadung enggau ulah industri meruan.

“Bepelasarka nya, aku deka meri tabi puji ngagai CMS ke pemerani sida ngena teda nyadi sebagi ari penatai kuasa, sereta ngasilka, baka ke dipadah ngagai aku tadi, simen nyaga rampa menua.

“Kereban tu mih ti beguna endar ke kitai maya tu dikena nyemela empas pemansut karbon," ku iya.

Iya madah munyi nya maya bejaku ba Program Nasih Tanah Projek Clinker Line 2 di Loji Besepadu Mambong, ditu, Hari Empat.

Ke penemu mayuh, CMS Berhad udah meranak puku RM673 juta dikena ngaga projek nya ke disadang ulih nambah kapasiti ngeluar 'clinker' ngagai 1.9 juta tan metrik setaun, lalu nentu bekal simen di Sarawak.

Nerang silik, Datuk Patinggi Abang Zohari madah, pemesai reti industri simen ti tegap dikena nyaup ungkup guna sektor berumah enggau infrastruktur ti majak ngerembai di Sarawak.

“Tu udah ngulihka Sarawak majak mansang, lebih agi ba sektor berumah enggau mega infrastruktur ti mujur ngangkat ekonomi kitai nyentuk ke sehari tu,” ku iya nerang baru.

Sama datai, Sapit Menteri Pengangkut Sarawak (Langit enggau Jalai) ke mega Kaban Kunsil Nengeri (ADUN) Mambong Datuk Dr Jerip Susil, Sapit Menteri Kuasa enggau Pemeruan Rampa Menua Sarawak Datuk Dr Hazland Hipni, Sapit Menteri Infrastruktur enggau Pemansang Penyangkai Kapal Sarawak Datuk Ir Aidel Lariwoo, Chairman Raban Cahya Mata Sarawak (CMS) Berhad Dato Seri Diraja Tan Sri (Dr) Mohd Zahidi Zainuddin, Direktor Atur Raban CMS Berhad Dato Sri Sulaiman Abdul Rahman Abdul Taib sereta temuai dipebasa bukai.-EDISI UKAS

Pemberita: Jonnie Kiew
Gambar: Muhammad Rais Sanusi