BINTULU: Pengerami Makai Lemai Ngintu Taun Baru 2026 diatur Komiti Pemansang enggau Pengelikun Genturung Pendiau (JKKK) sereta Sitak Genturung Pendiau (KRT) Kampung Jabai richah diatur enggau penuh semangat beserakup ba Kemena Plaza Hotel, ditu kena Hari Tiga.

Pengerami nya digulu Kaban Kunsil Nengeri (ADUN) Tanjong Batu, Ts. Johnny Pang Leong Ming, sereta Tuai Kampung Jabai, Johny Simon.

Lebuh bejaku, Johnny Pang meri terima kasih ngagai raban pengatur enggau semua peranak Kampung Jabai laban udah nanggam kerejasama sereta sukung dikena ngemansang komuniti lokal.

Ku iya, pemansang enggau ubah positif ti ulih dipeda ba Kampung Jabai diatu nya asil kerejasama rat, semangat beripai sereta komitmen semua raban.

"Semua pemujur tu ukai asil inisiatif siku individu tang mega pemujur begulai asil sukung enggau penyerakup semua peranak," ku iya.

Ku iya, seagi dilempai tanggungpengawa nyadi pengari rayat, iya deka terus ngemerat pemansang komuniti, ngemanah perengkaguna pemun, pengelikun sereta pengelantang rayat.

Berebak enggau nya, iya mega ngarap Bintulu semampai dijaga ari sebarang penusah ngenyit kelebih agi penusah bah.

Pengerami nya mega digulu tuai komuniti, kaban JKKK enggau KRT sereta peranak Kampung Jabai.

Johnny Pang mega ngena peluang nya meri Selamat Taun Baru 2026 ngagai semua ti datai lalu ngarap taun baru meri pengelantang ngagai komuniti lokal.