KUCHING: Komiti Penyangga Penusah Nengeri Sarawak (JPBNS) mengkang ba tikas besikap napi sebarang gelumbang bah taja gaya hari ba sekeda endur diatu diripotka majak manah.
Sapit Premier Sarawak ti mega Chairman JPBNS Datuk Amar Douglas Uggah Embas madah, semua agensi udah digerah terus besikap sereta matau rat endur bisi risiko tinggi kelebih agi ba endur baruh ti suah bah.
Ku iya, taja bisi sekeda raban tasah bah udah dikemendar pulai ke rumah soda berindik ari tikas ai nyau surut tang kitai meseti besikap berindik ari gaya hari ti enda tentu.
"Tu engka renggat keterubah bah. Kitai ngarap gelumbang bah bukai enda nyadi tang nitih ke gaya hari, pekara tu engka nyadi nyentuk bulan March.
"Nya kebuah, semua raban meseti seruran sedia," ku iya.
Iya madah munyi nya ngagai pemberita pengudah ngabas Palan Ngenduh (PPS) Sekula Primari China (SJKC) Chung Hua Sungai Tengah kena Hari Enam.
Datuk Amar Douglas Uggah mega nyemetak madah ke peranak meseti nitih ke atur gerah pindah ti dikeluar ravan bekuasa dikena nyamin pengelikun nyawa berindik ari tikas ai ulih niki ba timpuh ngenyit kelebih agi pengudah ujan bangat enggau ai pasang raya bela nyadi.
Nambah ke nya, ku iya, semua agensi bekaul nyengkaum Raban Penyangga Orang Periman Malaysia (APM), Polis DiRaja Malaysia (PDRM), Opis Bomba enggau Penyah Penusah Malaysia, raban bekuasa lokal sereta Opis Parit enggau Entali Ai (DID) terus bejalaika pengawa matau ba endur bisi risiko enggau sungai.
Ku iya agi, semua JPBNS ba renggat bagi menua mega digerah nentuka PPS udah sedia nyengkaum ari sukut pemeresi, perengkaguna, bekal pemakai enggau perengkaguna pemun ungkup raban tasah bah nyema bisi pengawa mindah betambah.
Dulu ari nya, Datuk Amar Douglas Uggah udah ngabas PPS Surau Ar-Rahman Kampung Sungai Batu ti dibuka kena 1 Januari 2026 ngambi berati ke pekara ti nyadi sereta pengelantang 52 ari 12 ruang bilik raban tasah bah.
Iya mega bisi ngabas PPS Masjid Darul Istiqlaal Kampung Sungai Maong ke diatu ungkup 128 raban tasah bah ari 26 ruang bilik.-EDISI UKAS
Pemberita: Nur Nabilla
Gambar: Hazrin Sunaini & Muhammad Rais Sanusi
