KUCHING: Perintah Sarawak nentuka atur Palan Ngenduh (PPS) ba selampur nengeri terus nitih ke atur pengawa standard ti ditetapka seraris enggau pengeran nyaga pengelantang enggau pengelikun raban tasah bah.
Sapit Premier Sarawak ti mega Chairman Komiti Penyangga Penusah Nengeri Sarawak (JPBNS), Datuk Amar Douglas Uggah Embas madah, atur PPS naka diatu manah enggau pengawa nyendia perengkaguna pemun ti chukup nyengkaum tilam, pemakai, ai irup, bekal ai angat sereta kereban perubat nentuka pengelantang raban tasah bah sepanjai timpuh bepindah nya.
"Taja bisi sekeda isu ba renggat tumu muka PPS, semua nya udah diputar lengkas nengah penyeraris begulai entara agensi bekaul, " ku iya.
Iya madah munyi nya ngagai pemberita pengudah ngabas Palan Ngenduh (PPS) Sekula Primari China (SJKC) Chung Hua Sungai Tengah kena Hari Enam.
Datuk Amar Douglas Uggah nyemetak madah ke batang tuju perintah nengeri nentuka PPS nyadi palan ngelindung ti likun, beresi enggau lantang ungkup raban tasah bah.
Iya mega madah, naka diatu bisi 12 PPS udah dibuka ba Sarawak ngaul 343 ruang bilik enggau 1,347 raban tasah bah nyerangkung sitak Kuching, Lawas enggau Kota Samarahan.
Dulu ari nya, Datuk Amar Douglas Uggah udah ngabas PPS Surau Ar-Rahman Kampung Sungai Batu ti dibuka kena 1 Januari 2026 ngambi berati ke pekara ti nyadi sereta pengelantang 52 ari 12 ruang bilik raban tasah bah.
Iya mega bisi ngabas PPS Masjid Darul Istiqlaal Kampung Sungai Maong ke diatu ungkup 128 raban tasah bah ari 26 ruang bilik.-EDISI UKAS
Pemberita : Nur Nabilla
Gambar : Hazrin Sunaini & Muhammad Rais Sanusi
