KUCHING: SMD Semiconductor ngatur ‘Sarawak Sovereign AI Workshop’ nyadi inisiatif strategik nambah oenemu bekaul operasyen ti diguna dikena nyaup sistem Artificial Intelligence (AI), nyerangkung pekara polisi, teknikal enggau pejalai pengawa ti nyata ba renggat nengeri.

Ba siti penerang media SMD Semiconductor kena Hari Tiga nerang, worksyop tu ngempuru penengkebang polisi, agensi pengatur sereta pemekuh industri dikena nyeraris penemuai kolektif senentang pemesai guna ekosistem AI, belabuh ari perambu infrastruktur fizikal enggau digital, guna computer betikas tinggi, pengelikun enggau atur data, perambu kuasa ti meruan nyentuk integrasyen sistem enggau penyikap operasyen.

Tuai Pegawai Eksekutif SMD Semiconductor, Shariman Jamil udah ngulu program randau strategik ti ngempuru ‘stakeholder’ sektor perintah sereta bakih industri ba pengeran nyaup Sarawak besikap timpuh panjai Sarawak nuju pemansang Artificial Intelligence (AI) strategik.

Randau ba woksyop merati ke guna pengawa nyeraris entara agensi, tanggunpengawa nyengala sereta ‘interdependencies’ ba ekosistem AI, sereta tikas penyikap institusyen dikena nyaup bekenaka AI enggau chara ti likun, bisi etika sereta tan ba timpuh panjai.

Rebellions Inc. ari Korea Selatan ti bekunsi penemu bela madah ke chara pemadu manah global ba pemansang chip AI enggau pejalai sistem betikas besai, lalu mantu penyereta nisih guna operasyen AI Sarawak ba konteks antarabansa.

Nangkan woksyop nya, SMD Semiconductor deka nyendia konsolidasyen nengah penemu begulai ti dijapai, netapka takah pengawa besikap sereta tuju strategik ti disetuju ke deka dibantai ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, nyadi buah penemu ba perambu polisi enggau pejalai AI nengeri.

Pengawa ngatur woksyop tu ngelai pemansang besai ari konsep ngagai rentayan penemu operasyen, seraya negap pelasar Sarawak nuju pemansang AI ti berurun, begulai sereta besemekih.

Sama datai, Sekretari Mendam Opis Menteri Dagang Antarabansa, Industri enggau Meranak Puku (MINTRED) Sarawak, Datu Lester Matthew enggau Sapit Luyar Besai Sarawak Datu John Wayne Chamberlin Sirau. -EDISI UKAS