SARIKEI: Sepenyampau 2,379 nembiak ari 19 sekula ba pelilih tu nerima bantu uniform enggau kasut sekula dikena mantu ngelempungka tating belanja apai indai.

Sapit Menteri Kebun Dandang Besai enggau Komoditi ti mega Kaban Parlimen Sarikei, Dato’ Sri Huang Tiong Sii madah, inisiatif nya seruran ditandu nentuka bala nembiak berasai lantang maya bepungkal sekula.

“Bantu tu meri pemaik besai ngagai apai indai, kelebih agi sida ti mayuh anak agi besekula. Tu mega nyaup ngelempungka tating belanja sekula,” ku iya.

Iya madah baru, bantu nya udah disadung Tim Palan Servis Pengari Rayat ti betuai ke Penghulu Huang Tiong Kang begulai enggau Kapitan Ling Dien Yong ngagai nembiak.

Dato’ Sri Huang ti mega Kaban Kunsil Nengeri (ADUN) Repok madah, pelajar nyadi pekara pemadu beguna dikena rebak biak ngulihka pengidup menyana dudi hari lalu patut diberi perati.

“Ari bantu uniform enggau kasut sekula tu, nembiak ulih belajar enggau ati lantang. Dikearap tu mega meri peransang ngagai sida terus ransing belajar,” ku iya.

Entara 19 sekula ti nerima bantu nya baka SK Methodist Anglo-Chinese, SK St Anne, SJK (C) Kwang Chien, SJK (C) Wah Man, SJK (C) Su Ming, SJK (C) Su Tak, SK Tanah Putih, SK Sungai Petai, SJK (C) Hua Nam, SK Abang Haji Matahir, SK Agama Sarikei, SK Sarikei, SJK (C) Su Lee, SK Sungai Sentebu, SJK (C) Su Lok, SJK(C) Su Hing, SK St. Andrew, SJK (C) San Ming enggau SK Adin.-EDISI UKAS