SIBU: Hospital Sibu majak entap penuduk ba diagnostik kardiovaskular lebuh nyadi hospital keterubah di Malaysia disikap teknologi Pengimejan Resonans Magnetik (MRI) tungkul ati ti nyau deka nadai helium, lalu nya ngerembaika akses perubat pakar ngagai pesakit ba kandang menua tengah Sarawak.

Sapit Premier Sarawak ti mega Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Amar Profesor Dr. Sim Kui Hian madah, teknologi nya ukai semina pemadu baru aja, tang kelai belidar ari MRI konvensional ti dikena ngelama tu begunaka helium ti mayuh ungkup sistem magnet.

Ku iya, ulih scan tungkul ati ngangkatka Hospital Sibu ba tikas tinggi agi, laban teknologi nya mayuh agi leman dibanding MRI selama.

Iya nyebut jaku nya lebuh dirandau pemberita pengudah bejadi ngelanchar mesin nya di Hospital Sibu, Hari Lima.

Aset nya dibeli nengah kolaborasyen strategik entara Yayasan Tungkul Ati Sarawak, Opis Menteri Pengerai Malaysia, 20 pemelanja sereta Philips Malaysia.

Insiaitif nya bepun ari pemeri 20 pemelanja ti mujur ngiga belanja RM2.02 juta, seraya Opis Menteri Pengerai Malaysia mega ngagihka RM1,208,018 dikena nambah fasiliti endur mesin nya.

Ari pemisi teknologi nya, pesakit enda ibuh nganjung diri scan tungkul ati ke Kuching, lalu nya ngelempungka tating belanja enggau ngerumban perubat.

Datuk Amar Dr Sim madah, lutur ulih nyerenih bekal darah ke tungkul ati nengah cardiac MRI sereta nyidi arteri alit enggau betul agi.

Kelimpah ari nya, ku iya, teknologi nya ulih nentu sekali ke isi tungkul ati agi manah tauka udah mati, ti ngasuh perubat ulih dipejalai baka beputung (bypass), gelembung tauka ngaga stent.

Mesin nya mega ulih ngadu mayuh bansa scan ke bukai nyengkaum untak enggau selampur tubuh, lalu nya negapka penau diagnostik Hospital Sibu nyadi entara hab perubat besai di Sarawak.-EDISI UKAS