LIMBANG: Penuduk strategik utara Sarawak majak nyadi penyungkak ekonomi menua sereta ngerembai makit serantau, lalu ngangkatka kandang menua nya entara hab pemansang besai di nengeri tu.

Sapit Premier Sarawak, Datuk Amar Awang Tengah Ali Hasan madah, menua baka Limbang enggau Lawas ngembuan pengelebih geografi nyelai laban sepiak Brunei Darussalam, Kalimantan (Indonesia), Sabah enggau Labuan, ti ngerandang peluang besai ngagai aktiviti dagang enggau meranak puku.

Ku iya, pengelebih nya patut dikena manah ari sukung belanja ke bisi dikena ngeranchak pemansang ekonomi sereta negap rentayan dagang ngilah menua.

“Penuduk kitai ti strategik tu ngerandang peluang besai ngemansangka dagang ngilah menua tauka 'cross-border trade', lalu nyungkak aktiviti ekonomi ba menua tu,” ku iya.

Iya nibar ke jaku nya ba mua mayuh rambau Pengerami Ramah Tamah Aidilfitri Pelilih Limbang 2026 diatur di Dewan Suarah Limbang, Hari Empat.

Iya mega madah ke pemesai guna pengawa ngusung pangan diri kelebih agi maya Aidilfitri, dikena nyempil kaul enggau kerejasama pupu bansa di Sarawak.

Ku iya, penyerakup ti tegut nyadi pugu politik nengeri tegap, lalu ngasuh Perintah Sarawak betuai ke Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ulih meri perati ngagai agenda pemansang enggau pengelantang rayat.

Iya madah baru, Sarawak diatu ba jalai pemansang ti progresif enggau inklusif, disukung asil nengeri ti signifikan.

Asil nya, ku iya, dikena nambahka infrastruktur, ngemansangka sosioekonomi rayat, ngintu pengelantang rayat sereta negap pelajar enggau pemansang pengelandik.

“Sarawak mefa chakah nyerungkai bidang baru baka ekonomi digital, teknologi besai empas, kuasa ulih dikena baru, industri semikonduktor enggau aeroangkasa nyadi pengawa strategik nyendiaka mayuh agi pengawa puang enggau ngangkatka tikas idup rayat,” ku iya nyemetak.

Sama datai, Sapit Menteri Pengangkut Malaysia ti mega Kaban Parlimen Limbang, Datuk Hasbi Habibollah, Sapit Menteri Industri Pemakai, Komoditi enggau Pemansang Kandang Menua Sarawak ti mega ADUN Bukit Kota, Datuk Dr Abdul Rahman Ismail, Residen Bagi Menua Limbang, Unus Tambi, Sekretari Politik Premier Sarawak, Awangku Jinal Abedin Dato Pengiran Jawa sereta Sapit Residen Bagi Menua Limbang, Marie Cotilla Lousie.- EDISI UKAS