LUNDU: Unit Komunikasi Awam Sarawak (UKAS) chakah besikap napi pemar landskap komunikasyen taun 2026 nengah Program Team Building UKAS 2026.
Direktor UKAS, Awang Putrayusrie Awang Redzuan madah ke program nya ukai semina pelasar nempa tim, tang nyadi pelasar strategik nusun baru perambu gawa, ngalus ke polisi komunikasyen sereta negap pengetan runding enggau batang tubuh raban UKAS maya bejalaika pengawa nabur penerang perintah ngagai rayat.
Ku iya, program bepuguka konsep ‘3R’ iya nya Revisit, Rethink and Recharge meri awak ngagai raban UKAS nyerenih baru chara ke bisi diatu, ngemanah perambu program ba menua sereta meri peransang ngambi terus regas gawa sepanjai taun.
“Taun 2026 disadang mayuh agi pemar ditapi enggau bemacham agenda Perintah Sarawak ti patut ditesau ngena chara ti nemban.
“Nya alai, UKAS patut nyingkang nyadi siti tim ti begempung, sikar enggau responsif ba isu kemaya hari,” ku iya ba mua mayuh rambau Pengawa Nangguh Team Building UKAS 2026 ti dipenyadi Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol, di Lundu kena Hari Minggu.
Iya mega nyemetak madah ke pemesai guna pengawa ti betul enggau kredibiliti ba nabur berita UKAS, seraya ngingatka semua pegawai ngambi seruran nemu isu ti dikerembai, meresa enggau jampat mutar sebarang pengilap ba berita dikeluar dikena ngetanka pengandal raban bisi kaul besai.
Berebak enggau nya, iya meri terima kasih ngagai Datuk Abdullah ti seruran ngembing enggau negapka atur pengawa komunikasyen strategik UKAS, kelimpah ngenang kerejasama Administrasyen Pelilih Lundu enggau komuniti meua nya ti ngerandang peluang interaksyen sosial begulai enggau raban UKAS.
Awang Putrayusrie mega meransang raban UKAS terus nambah penemu enggau profesionalisme, nyengkaum ngerebut peluang nampung pelajar dikena negap penemu pakar ba bidang komunikasyen awam, seriris enggau pangku pengawa UKAS ti nyadi penyambung ti amat entara perintah enggau rayat.
Program tu mega ngaul fasilitator profesional sereta raban UKAS ari selampur Bagi Menua Sarawak, lalu mandangka pengeran organisasyen nempa siti tim komunikasyen ti dinamik agi, inovatif enggau teguh.
Sama datai, Pegawai Tadbir Khas UKAS Datu Takun @ Takon Sunggah, Menijar Operasyen SALCRA Bajo Training Center Mohd Affendy Bujang, Menijar WRK Learning Ahmad Rusdi Shamsuddin sereta bala pegawai kanan UKAS.-EDISI UKAS
