KUCHING: Perintah Sarawak nyukung penemu Opis Kastam Diraja Malaysia neritka agi atur ngena data pengirum ba semua barang ari Semenanjung Malaysia enggau Sabah ke Sarawak.
Menteri Raban Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah madah, penanggul bekaul data pengirum nyengkaum endur diau enggau penerang bula semampai mai penanggul ba pengawa mansik lalu nekul opis bekuasa ngadu pengawa.
"Enti penerang enda silik, tu tau nekul pengawa mansik lalu ngujung ngenataika penanggul ba kot.
"Nya alai, PEMADAM Sarawak nyukung amat penemu Kastam ngambika barang ke dikirum meseti ngena data tauka penerang pengirum ke amat," ku iya maya aum media sepengudah betuaika Aum Komiti Pengatur Gerempung Ngemunas Dadah Malaysia (PEMADAM) Nengeri Sarawak ditu, Hari Satu.
Aum nya digulu agensi bekaul, gerempung ukai dikuasa perintah (NGO) sereta 45 iku Pegawai Pelilih Menua ke nyadi Chairman PEMADAM Pelilih Menua di Selampur Sarawak.
Dato Sri Abdul Karim ke mega Chairman PEMADAM Sarawak bela nerangka pengawa PEMADAM ti lebih agi bekaul pelajar enggau penemu mensia mayuh bekaul dadah, ti bebida enggau pengawa Agensi Antidadah Menua (AADK) enggau Polis Diraja Malaysia (PDRM).
Ba pekara bekaul iya mega madah, aum nya besetuju nambah agih belanja ninting taun ungkup PEMADAM Nengeri Sarawak ari RM500,000 ngagai RM1 juta dikena nyaup ngatur mayuh agi program nyeliah penusah dadah.
"Langgur tu deka dibai ngagai Kabinet Nengeri," ku iya nerang.
Bela datai Mandal Yang Dipertua PEMADAM Sarawak, Datuk Sharifah Hasidah Sayeed Aman Ghazali. -EDISI UKAS
