KUCHING: Sarawak benung berati enggau chara strategik semua spektrum teknologi angkasa, nyengkaum pengawa praktikal sistem statelit mit, lebih agi platform CubeSats ti ulih ngurangka penanggul belanja nengeri.

Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, ungkus satelit konvensional entara 100 ngagai 300 juta euro ti begunaka lima ngagai 15 taun digaga enti dibanding CubeSats ti berega kurang ari 500,000 euro enggau semina begunaka timpuh kurang ari setaun digaga.

Nitih ku iya, chara tu praktikal dikena Sarawak ti berati ke teknologi satelit, bekena data enggau aplikasyen ti nyaup ngatur kampung enggau reta, betanam betupi, pengawa nyikap penusah ngenyit sereta pengawa matau maritim, seraya meri pemaik ngagai rayat.

"Ungkup Sarawak, tu siti perengka guna strategik ke alai geografi nyelai kitai baka kampung, sungai enggau tebing tasik ti panjai ukai semina tusah dipatau, tang nyadi makmal idup pemadu besai dikena nguji, nentu sereta nyaup rebak dudi ba pengawa mutar bepelasarka teknologi angkasa,” ku iya.

Iya madah munyi nya maya bejaku ba Program Bejadi Asia Pacific Aerospace Conference & Exhibition (APACE) 2026 di Palan Konvensyen Borneo Kuching (BCCK), Hari Dua.

Nangkan nya maya dirandau pemberita, Premier Sarawak madah, chara tu dikena ungkup rampa menua enggau tanah di Sarawak nyengkaum sebagi ari chara nagang bah.

Ku iya nerang, satelit tu ulih ngira ‘karakter’ tanah baka paya enggau arus ai dikena ngulihka data ti betul alai ngaga pegung nimbun ai ba kandang ke selalu bah.

Nya alai, ku iya, perintah deka nisih ungkus sereta pekara teknikal senentang CubeSats ti patut ditisih manah.

Iya madah, pekara tu, lebih agi ngaul timpuh pengelama CubeSats ulih dikena ti semina tan empat ngagai lima taun aja.

"Tang pekara ke dikira diatu, sistem tu ngembuan timpuh dikena entara empat ngagai lima taun lalu udah nya patut diganti baru.

"Tu reti iya tiap lima taun, kitai patut ngemanah agi ngagai ke baru laban sistem tu bisi timpuh iya.

“Ba maya tu, satelit nya deka melepung ba angkasa, lalu kitai deka mancharka satelit ti baru ngambi servis ulih terus dikena,” ku iya nerang.

Nambah ke jaku iya, iya madah, satelit nya enda dipanchar diatu ngira teknologi begunaka pengereja pengawa landik.

Berindik ari nya, perintah nengeri, ku iya deka ngadu pekara nya siti siti enggau ngadaka pengereja pengawa bepengelandik dulu nengah Fakulti Aeroangkasa Kolej Universiti i-CATS nengah kerejasama Tsinghua University enggau Instanbul Technical University.

Ku iya nerang, pengereja pengawa ke diguna abis nadai 30,000 juruteknik satelit.

Sama datai, Sapit Premier Sarawak Datuk Amar Douglas Uggah Embas enggau Datuk Amar Prof Dr Sim Kui Hian, Menteri Pelajar, Inovasyen enggau Pemansang Penau Sarawak Dato Sri Roland Sagah Wee Inn, Menteri Ba Opis Premier Sarawak Dato Sri John Sikie Tayai, Menteri Pengangkut Sarawak Dato Sri Lee Kim Shin, Sekretari Perintah Sarawak Datuk Amar Mohamad Abu Bakar Marzuki, Sapit Menteri Sarawak, Penyanding Penemu Borneo Business Connect Sdn Bhd Jeneral (B) Tan Sri Dato Sri Affendi Buang, raban tuai opis perintah sereta pemesai ke bukai. -EDISI UKAS

Pemberita: Ahmad Daniel Faiz
Gambar: Muhammad Rais Sanusi