KUCHING: Belanja digital nengah Langgur Pemansang Malaysia Lumpar Ke-13 (RMK13) deka dikemendar lalu ditandu bepelasarka pemutus dipesetuju.
Sapit Sekretari Perintah Sarawak (Operasyen), Datu Hii Chang Kee madah, projek digital nengah RMK-13 deka diatur nengah Agih Belanja Bepelasarka Pemutus (RBB).
“Reti nya, pemendar belanja deka dijantil enggau asil ti nyengala, Key Perfromance Index (KPI) enggau juluk bejalaika servis.
“Pengawa meri bajet deka digaga berenggat sereta bepelasarka tikas pemanah, lalu tampung bisi lebas ke patut dititih enggau pemansang ti dipandang,” ku iya nerang.
Iya madah munyi nya ba Program Kaul Pengawa Nyeraris Pejalai Projek Digital ari Agensi Perintah Sarawak nengah RMK13 ti diatur Unit Digitalisasyen Servis Perintah Sarawak (SCSDU), ditu, Hari Empat.
Datu Hii ti mega Tuai Pegawai Digital Perintah Sarawak nyemetak madah, nengah RMK-13, digitalisasyen ukai pekara dipilih agi, tang alai nguji tauka khas ungkup siti siti agensi, tang nya ungkup guna ba pengawa ngenatai servis sektor perintah.
Nya alai, iya ngingatka projek ti puntan mandangka proses dagang ti nemban, ngembuan pelasar belipat tauka nyeliah ari mutar selampur Perintah tauka puntan nempa tikas penyulut, asil ripot ti dipesetuju, nyangka deka dipelanja, ngurang tauka ambi pulai belanja ti dikemendar seriris enggau prinsip RBB enggau atur perintah tadbir.
Nengah Strategi Pemansang Pengudah COVID-19 (PCDS) 2030 enggau Strategi Ekonomi Digital Sarawak (SDE) 2030, Datu Hii nerangka, perintah nengeri udah bisi juluk digitalisasyen ti nyengala sereta berenggat ti diatu nyadi lalau asil RBB, enggau abis nadai 50 peratus servis perintah dipelaba dipejalai nengah digital manggai 2025, niki ngagai 80 peratus manggai 2027, lalu nyapai 100 peratus servis ti engkeman manggai 2030.
“Juluk tu deka dikena maya nisih projek, pengawa nangkan nya, ungkup bajet baru sereta tikas pemanah agensi ari baruh RMK13.
“Perintah Sarawak udah netapka 1,106 servis perintah ti meri servis ngagai mensia mayuh. Nyentuk Disember 2025, 60.4 peratus ari servis tu udah bisi ba tali arus.
“Taja tu mandangka pemansang ti meransang, nya mega begunaka disiplin bejalaika pengawa ti tegap agi sereta servis ti konsisten di selampur agensi,” ku iya nerang.
Sama datai Direktor SCSDU enggau Chairperson Pengatur, Datu Grace Huong Siew Hung sereta raban Tuai Opis Perintah - EDISI UKAS
