KUCHING: Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar nerima penemuai basa ari deligit Kaunsil Datuk-Datuk Perintah Besai (MDPM) ti betuai ke Presiden iya, Datuk Tee Guan Pian ba rumah rasmi iya, Hari Empat.

Tuju penemuai deligit nya dikena madah ke rintai tuai MDPM kelimpah minta sanding penemu ari iya.

Deligit MDPM iya nya Datuk Seri Dr Irmohizam Ibrahim, Sapit Presiden Datuk Dr Ahmed Tasir Lope Pihie, Sekretari Besai Datuk Wira Rosli Mat Hassan, Mandal Presiden I Datuk Abdul Razak Dawood, Mandal Presiden II Datuk Mohd Nawawi Awang, Kaban EXCO Datuk Gnanasambatham Doraisamy enggau Datuk Jacky Chai Chaun sereta Datuk Adrian Wei Hua Ung.

Tuju penemuai basa nya mega dikena ngenegap kaul entara raban nya enggau institusyen pemadu tinggi nengeri.

Bela dikenang iya nya pekara bekaul penyerakup, rama, pengelantang enggau tanggungpengawa kaban nya ba nyaup pemansang rayat di Sarawak seriris enggau agenda nasional.

Kelimpah ari nya, Yang di-Pertua Negeri Sarawak bela bekunsi penemu bekaul penyerakup bansa ba Sarawak ke nyadi banding ti manah ke alai rayat pupu bansa seruran idup lantang sereta bekaul rat.

Maya nya mega, iya meri terima kasih ngagai MDPM laban deka ngerapitka kaul manah agi enggau rayat Sarawak. -EDISI UKAS

Pemberita: Ahmad Daniel Faiz
Gambar: Ibanez Jeffery