KUCHING: Haribulan ungkup Pengawa Bepilih Nengeri (PRN) Sarawak ke-13 nadai dipadah enda lama da.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, taja pen PRN enda tau enda diatur pengudah abis timpuh penggal Kunsil Nengeri (DUN), tang enda diatur enda lama da.
“Pengudah timpuh penggal abis, kitai enda meseti ngatur PRN, tang ukai enda lama da laban timpuh nya agi panjai,” ku iya lebuh dirandau pemberita pengudah bejadi Sekula Sekondari Antarabansa Yayasan Sarawak (YSISS) ditu, kena Hari Enam.
Sebedau tu, Menteri Kereja Raya ti mega Sekretari Besai Gabungan Parti Sarawak (GPS), Dato Sri Alexander Nanta Linggi madah ke PRN Sarawak disadang diatur taun tu tang nyemetak madah ke pengawa netapka haribulan enggau bulan nya hak prerogatif Premier Sarawak.
Ke rikod, PRN Sarawak ke-12 ti kepenudi diatur kena 18 Disember 2021 lalu diatu, Sarawak bisi 82 penuduk DUN.-EDISI UKAS
