KUCHING: Ripot berita ti enda beradat meseti diterit atur kelebih agi lebuh nyerang pemaik enggau hak Sarawak enggau Sabah sereta ngenggaika hak nya.
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol nyemetak madah ke pekara nya seraya nunjukka siti portal media sosial dikelala enggau nama Berita 757 ti enda beradat enggau puntan ngasi ke etika media.
Ku iya, chara ngaga ripot ti diadu portal nya nyengala enda nitih ke norma media lebuh suah nerang ke penerang ti enda nyengala baka ‘pakar politik’ enggau ‘pemerati’ lalu enda nerang ke penerang asal enggau analisis.
“Gaya ripot sida nyau baka nunjukka kitai tu amu, sumbung enggau ke bukai, aku meda nya nyeremin sida empu laban kenyau ari kelia, Sabah enggau Sarawak semampai ngemeran ulah bebatak asur enggau berandau manah ba polisi sereta politik kitai.
“Tang, provokasyen sida berapa hari tu dipeda nyau kelalu, nya kebuah Premier Sarawak udah ngelalau aku enggau bala bukai ngambi anang kelalu ngemana pekara nya laban iya milih chara diplomasi enggau berandau dibanding provokasyen,” ku iya.
Iya madah munyi nya lebuh dirandau pemberita pengudah Pengawa 'Walk For Health' Begulai Enggau Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Taman Botani Sarawak, Petra Jaya, kena Hari Minggu.
Iya mega ngingatka gaya provokasyen ti kelalu ulih ngasuh rayat saru penemu, kelebih agi sida ti enda mereti ke konteks asal kaul entara Perintah Besai enggau Sarawak sereta Sabah.
Tu kelebih agi lebuh nya ngaul isu sensitif baka pengawa nagih bekaul pemansut gas enggau pekara bekaul undang-undang, ku iya nyemetak.
Ku iya, ukai semua orang mereti ke konteks asal lalu peragam ti enda beradat ulih ngirauka ati rayat.
“Pekara tu enda manah ba pengawa kitai nyaga kaul ti manah enggau lantang entara Perintah Besai enggau Sarawak sereta Sabah,” ku iya.
Pemberita : Ahmad Daniel Faiz
Gambar: Hazrin Sunaini
