KUCHING: Tuai Opis Servis Perintah Sarawak (SCS) meseti ngembuan penau ngatur ubah chara nemban nentuka pengawa ngenatai servis perintah meruan relevan, responsif lalu seraris enggau peminta kemaya hari ti majak dinamik.

Sekretari Perintah Sarawak, Datuk Amar Mohamad Abu Bakar Marzuki madah, landskap ubah diatu jampat agi enggau meseti sikar sereta diulu ke tuai ti jauh timpai ari Tuai Opis nyadi pengemudi organisasyen.

“Nya kebuah, nyadi Tuai Opis nya nyadi tanggungpengawa kita semampai ngemanah chara kita ngesan pangku pengawa, chara kita ngatur staf, chara kita ngatur penguna enggau ke bukai laban kitai enda ulih lari ari semua pekara tu.

“Aku pechaya dudi hari pangku pengawa kitai deka berubah lalu ba aku, pengudah aku pinchin nyadi Sekretari Perintah, sida ti deka mangku pengawa nya ila tentu deka mai penemu baru lalu tu enda sama baka sebedau tu.

“Tang, pengujung iya semua nya bekaul enggau ubah,” terang iya.

Iya madah munyi nya lebuh ngenataika pesan ba Program Ngerembai Kereja Gred 14 ke JUSA – Berunding Baka Siku Tuai: Ngansah Pengelandik Tuai Ungkup Pegawai Kanan Servis Perintah Sarawak, ditu kena Hari Minggu.

Datuk Amar Mohamad Abu Bakar mega madah, Tuai Opis enda patut bepegai ngagai chara konvensional aja tang bejalaika inisiatif baru ngambi ngatur ubah.

Ku iya, chara ngabas meseti dikemeran dalam SCS ngambi sida nemu agi pekara ti diguna seraya bejalaika atur ti patut nentuka genap pangku pengawa diadu lanchar agi.

Ba program nya, bisi 19 Tuai Opis udah dikangau mendingka penerang nyadi sebagi ari program pemansang kediri pegawai sebedau ngagai Gred Utama C (VU7). -EDISI UKAS