KUCHING: Sepenyampau 19 pegawai kanan Servis Perintah Sarawak (SCS) ngambi bagi ba Program Berunding enggau Gawa Baka Siku Tuai : Program Pemansang Kereja SCS ti diatur pengelama dua hari, belabuh ari 31 Januari nyentuk 1 Februari 2026.

Program diatur Leadership Institute of Sarawak Civil Service (LISCS) enggau kerejasama Unit Pemansang enggau Pemansang Pengereja Pengawa, Opis Premier sereta bakih strategik‘Razak School of Government’ (RSOG) nya dikena ngansah runding nyadi tuai, runding strategik enggau penau pegawai kanan seraris enggau agenda pemansang Sarawak.

Sama datai ba program iya nya Sekretari Perintah Sarawak, Datuk Amar Mohamad Abu Bakar Marzuki, Luyar Besai Sarawak Dato Sri Saferi Ali sereta Sekretari Pekara Wang Sarawak Dato Sri Dr Wan Lizozman Wan Omar ti bekunsi penemu enggau peneleba bekaul tuai sektor perintah.

Nangkan nya, Datuk Amar Mohamad Abu Bakar madah ke nyadi tuai nya siti ‘kangau’ seraya ngemeratka pengawa ngetuai ti nemban bepun ari runding ti betul sereta begunaka ari chara reaktif ngagai tuai jauh timpai dikena nempa pemansang nengeri.

Ku iya, pengawa ngetuai ti nemban meseti bepelasarka pengawa gawa beraban enggau integriti.

“Chara nyadi tuai ditetapka nengah tikas tanggungpengawa, sedia belajar sereta pemintar mai juluk ngagai asil ti meri pemaik ngagai organisasyen, rayat enggau Sarawak,” terang iya.

Dato Sri Saferi mega nyemetak madah ke pangku pengawa tuai sektor perintah nyadi pengempu amanah ngagai undang-undang, institusyen enggau atur pengawa nengeri seraya ngemerat pemesai guna ngaga pemutus bisi prinsip sereta entap dikena nyamin pemansang timpuh panjai Sarawak.

Program nya mandang sesyen panel ngena pejuluk ‘Digital Thinking, AI and the Future’ti berandauka pangku pengawa transfomasyen digital enggau pemintar digaga dikena nempa landskap nyadi tuai sereta servis perintah dudi hari. - EDISI UKAS