SUK Sarawak Ngabas Langgur Projek Kuarters Orang Gawa Perintah Ba Padawan
PADAWAN: Pelilih Mit Padawan nurai sejarah pengudah nerima penemuai rasmi Sekretari Perintah Sarawak Datuk Amar Mohamad Abu Bakar Marzuki ngambi ngabas langgur taba Projek Kuarters Orang Gawa Perintah Sarawak ba pelilih nya kena Hari Enam.
Projek ti dilanggur tu deka digaga ba tanah pemesai 4.90 ikar (1.983 hektar) ngambi nyendia rumah ti lantang agi ngagai orang gawa perintah ba Pelilih Mit Padawan.
Ku Pegawai Tadbir Menguasa Opis Pelilih Mit Padawan Julius Scott Anak Sapong, penemuai rasmi Datuk Amar Mohamad Abu Bakar tu nyadi siti tipan sejarah berindik ari nya penemuai keterubah Sekretari Perintah Sarawak ngagai Pelilih Mit Padawan kenyau ari manggai 40 taun ditumbuh.
Ku iya, pelilih tu bepun enggau administrasyen ba Teng Bukap, Padawan, sebedau mindah ngagai opis ke bisi diatu ba Braang Bayur, Padawan.
“Penemuai nya siti basa besai ukai semina ngagai Opis Pelilih Mit Padawan tang mega ngagai semua pengereja ba Opis Pelilih Kuching enggau Opis Residen Bagi Menua Kuching,” ku iya.
Ba penemuai sebaka, Sekretari Perintah Sarawak mega biis limpang ngabas taba langgur Projek Integrated Administration Centre Pelilih Siburan, nyadi sebagi ari inisiatif meruan Perintah Sarawak negap fasiliti administrasyen enggau servis perintah ba sitak menua pesisir.
Sama datai iya nya Direktor Opis Tanah enggau Survei Sarawak, Datu Awang Zamhari Awang Mahmood, Sapit Residen Bagi Menua Kuching, Lim Hock Meng, Residen Bagi Menua Serian, Caroline Cleophas Joseph sereta temuai dipebasa bukai. - EDISI UKAS
