PAKAN: Perintah Sarawak keran nyaga pengelantang rumah sembiang pengarap bukai lebuh ngemendar agih belanja RM4.2 juta nengah Unit Pekara Pengarap Bukai (UNIFOR) ungkup sitak Kunsil Nengeri (DUN) Pakan kenyau ari taun 2019 nyentuk 2025.

Kaban Kunsil Nengeri (ADUN) Pakan, Tan Sri William Mawan Ikom madah, agih belanja nya udah meri pemaik ngagai 21 gerija.

“Bantu tu nyeremin penyiru Perintah Sarawak nentuka semua komuniti nerima sukung ti patut,” ku iya bejaku ba pengawa nyua agih belanja UNIFOR, ditu empai lama.

Iya mega madah, perintah nengeri deka nambah agih belanja UNIFOR taun tu, nitih ke atur sereta pengawa nganjung ripot pejalai projek dikena nyamin pengelurus ngena belanja nya.

Ku iya, pengawa ngagihka belanja dikemerat ngagai rumah sembiang ti bedau kala nerima bantu sebedau tu, ke alai penyampau agih belanja nya disadang tinggi agi dibanding taun ti dulu.

Tang, iya nyemetak madah ke genap projek ti nerima agih belanja UNIFOR enda tau enda nganjung ripot projek nentuka perintah ulih berati ke penemban enggau berati ke sukung bukai dudi hari.

“Skop agih belanja UNIFOR nyerangkung ngaga enggau nyeruri rumah sembiang, nyungkur, ngupas pendam, ngaga jalai tama sereta fasiliti bukai bekaul ngadu pendam, enda nyengkaum meli tanah,” terang iya.

Berebak enggau nya, ku iya, semua peminta agih belanja meseti dibantai nengah ADUN sitak sida sebedau diseraris raban UNIFOR seraya peminta baru ungkup taun tu dipinta dianjung abis laun bulan Februari tu. - EDISI UKAS