Pengawa Semampai Matau Kunchi Nagang Pengerekai Igi Penyakit
SIBURAN: Pengawa matau penyakit berampit ba renggat komuniti meseti semampai dipejalai enggau bemalinka data nentuka pengawa nagang ulih dikereja tumu agi enggau nemban.
Menteri Pelajar, Inovasyen enggau Pemansang Penau Sarawak ti mega Kaban Kunsil Nengeri (ADUN) Tarat, Dato Sri Roland Sagah Wee Inn madah, inisiatif ngelala tumu beguna amat laban mayuh penyakit berampit baka laten iya nya bisi tang nadai nunjukka kelai.
Ku iya, enti nadai dipatau, igi penyakit baka tu ulih ngerekai dalam komuniti enggau enda ditemu.
“Pengawa matau ti konsisten nentuka kitai manding data belama, ngelala risiko baru sereta berati ke penemban intervensyen pengerai mensia mayuh ti udah dipejalai.
“Nengah data ti betul, atur bukai ulih dilanggur enggau strategik agi dikena nyaga pengelantang komuniti,” ku iya lebuh ngulu program Disease Surveillance ditu kena Hari Minggu.
Iya nyemetak madah, pengeleda mensia mayuh bekaul pemesai guna beperesa pengerai meseti terus ditambah, kelebih agi ba sitak menua pesisir.
Kerejasama entara agensi perintah baka Sarawak Infectious Disease Centre (SIDC), raban bekuasa lokal enggau komuniti lokal nyata ngesan pangku pengawa besai dikena negap sistem pengerai mensia mayuh nengeri.
