JAKARTA: Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg ngentapka penuduk Sarawak ba panggau antarabansa lebuh dirintai entara tuai dunya ti deka bekunsi penemu ba Konferens Ekonomi Indonesia (IES) 2026 ti diatur kena 3 ngagai 4 Februari tu.

Iya datai ba Jakarta kena Hari Satu ngambi ngulu konferens tebilang nya, ti ngempuru tuai global, penempa polisi, tokoh ekonomi sereta pengemudi industri ngambi berandauka kuing tuju pemansang ekonomi serantau enggau global.

Penatai Premier Sarawak mega disempulang Sekretari Perintah Sarawak Datuk Amar Mohamad Abu Bakar Marzuki, Sapit Sekretari Perintah Sarawak (Perambu Ekonomi enggau Pemansang) Dato Sri Dr. Muhammad Abdullah Zaidel sereta pegawai perintah nengeri bukai.

Ba konferens nya, Datuk Patinggi Abang Zohari deka bekunsi peneleba sereta pemansang transfomasyen ekonomi Sarawak, nyengkaum inisiatif pemansang meruan ti majak narit perati ba renggat ASEAN enggau antarabansa.

IES 2026 ti besuluka jaku ‘Begulai Nyungkak Pemansang Meruan enggau Pengelantang Begulai’ nyadi pelasar besai berandauka isu strategik global nyerangkung pemansang inklusif, model ekonomi nasional, mobiliti pengereja pengawa, polisi dagang, pengawa meranakka puku industri, semekih dagang, transfomasyen digital, penuduk ekonomi ASEAN sertea strategi mutar pemar enggau risiko global.

Konferens ti diatur Indonesia Business Council nya ngempuru tuai dunya, tokoh ekonomi, korporat enggau pedagang, seraya nyendia awak berandau nengah randau polisi ti dalam agi begulai enggau perintah.

Taun tu, IES 2026 mega mandangka segmen baru, ‘IES in Action’, ti mandangka projek enggau pansik silik IBC kelimpah mandang inisiatif besai ti meri empas terus ngagai agenda pemansang ekonomi serantau enggau global. - EDISI UKAS