KUCHING: Borneo International Consumer Expo (BICE) 2026 nyadi pelasar ngenegap penuduk Sarawak nyadi hab serantau Borneo nengah pemekuh industri, orang dagang menua, agensi perintah sereta chap dagang antarabansa ari rantau tu mayuh ngambi bagi.
Sapit Premier Sarawak ti mega Menteri Pengerai Mensia Mayuh, Pengawa Berumah enggau Perintah Lokal Sarawak Datuk Amar Profesor Dr. Sim Kui Hian madah, pengawa ngatur program nya setipak enggau juluk Sarawak deka nyungkak pemansang ekonomi serantau sereta ngerembai rentayan kerejasama rembus entara menua.
“Borneo International Consumer Expo ukai semina pelasar pemandang enggau dagang, tang nyadi medium strategik dikena narak pengeleda penguna, meri peransang pengawa bedagang ti manah sereta ngenegap kaul enggau kerejasama entara penengkebang polisi, pemekuh industri enggau rayat,” ku iya.
Iya madah munyi nya maya bejaku ba program nutup BICE 2026 di Palan Konvensyen Metrocity (MCCC) kena Hari Minggu.
Datuk Amar Profesor Dr. Sim mega muji raban pengatur ti mujur ngatur BICE 2026 ti ngempuru lebih 250 vendor, nyengkaum penyereta ari chap dagang antarabansa, orang dagang menua sereta agensi perintah ari Sarawak, Sabah, Brunei Darussalam enggau Indonesia.
Seriris enggau agenda nyaga pengelantang rayat, BICE 2026 bela ngatur Jualan Rahmah ti nyual barang ungkup guna besehari- besehari ba rega ti patut dikena ngelempung ungkus belanja idup mensia mayuh .
Program nutup nya mandangka kelai basa ngagai champion mayuh program serimbai BICE 2026, nyengkaum Borneo Star Talent ti mungkur penau ari Sarawak, Sabah enggau Indonesia.
Program nya bela digulu Konsul Agung Negara Brunei Darussalam di Kuching Sheikh Abdul Madani Datuk Paduka Sheikh Abdul Ghani, Konsul Jenderal Republik Indonesia di Kuching Dr. Abdullah Zulkifli, sereta Sapit Menteri di Opis Premier Sarawak (Pekara Korporat, Pemadah enggau Unit Komunikasi Awam Sarawak) Datuk Abdullah Saidol.-EDISI UKAS
