IGAN: Perintah Sarawak majak ransing ngenegap rentayan infrastruktur menua pesisir lebuh Jematan Batang Igan disadang ulih ditengah mensia mayuh kena 15 Mac tu, lalu negut kaul peranak menua datai ba pengerami Hari Raya Aidilfitri.
Sapit Premier Sarawak, Datuk Amar Douglas Uggah Embas madah, pemisi jematan nya dia peranak badu agi bepanggai ba servis feri ngelayang Batang Igan lalu ngemanah tikas jalai penyambung ba menua pesisir.
Ku iya, sebedau tu pejalai ngena feri urung 30 minit, tang enti jematan nya udah tembu, pejalai pandak agi, semina berapa minit aja, lalu ngemuntangka pengawa besehari-sehari peranak menua.
Iya madah munyi nya maya dirandau media pengudah bejadi Pengawa Ngaga Sambung Kepenudi Jematan Batang Igan, ditu, Hari Tiga.
Datuk Amar Douglas Uggah mega nerang, projek nya dikeandal mai ubah besai lebih agi ari pekara perengka guna pemun, akses pelajar sereta pengelantang rayat ba kandang menua nya.
Kelimpah ari nya, ku iya, pengawa ngaga jematan nya mega deka ngerandang mayuh agi peluang pemansang aktiviti sosioekonomi sereta ngerumban pengawa nyerungkai pengulih ekonomi ke bisi ba kandang ngelingi.
Berebak enggau nya, iya meri terima kasih ngagai Opis Kereja Raya (JKR) Sarawak sereta raban kontraktor ke pengeransing nentuka projek nya tembu nitih langgur ti ditetap.
“Terima kasih mega ngaga semua raban ti udah meri kerejasama ngemujurka pengawa ngaga jematan tu," ku iya.
Sama datai, Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah, Sapit Menteri ba Opis Premier Sarawak (Integriti enggau Ombudsman), Datuk Dr Juanda Jaya, Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol, ADUN Tellian, Royston Valentine, Sekretari Mendam Opis Menteri Infrastruktur enggau Pemansang Penyangkai Kapal, Datu Chiew Chee Yau sereta Direktor JKR Sarawak, Datu Dr Cassidy Morris.- EDISI UKAS
