SINGAPURA: Kompeni penerebai enggi Perintah Sarawak, AirBorneo nanggam sempekat strategik begulai enggau pengeluar bilun, ATR, dikena ngemaruka armada Servis Penerebai Bilun Menua Pesisir (RAS) Malaysia.

Pengawa nyain sempekat nya dikemata Chairman AirBorneo Datuk Amar Mohamad Abu Bakar Marzuki sereta Tuai Pegawai Eksekutif ATR Nathalie Tarnaud Laude.

Sama datai rintai Kaban Kaunsil Direktor AirBorneo iya nya Dato Sri Wan Lizozman Wan Omar, Dato Sri Saferi Ali, Dato Sri Abdullah Zaidell, Datu Hasmawati Sapawi sereta raban pengatur AirBorneo.

Nengah sempekat nya, AirBorneo madahka udah meli lapan buah bilun ATR, nyerangkung lima ATR 72-600 enggau tiga ATR 42-600 lalu hak meli ungkup empat bilun bukai ke alai pengawa nganjung bilun disadang berengkah entara taun 2027 ngagai 2029.

Tuai Pegawai Eksekutif AirBorneo Megat Ardian madah, kerejasama strategik begulai enggau ATR siti pemujur ngenang pengeransing kompeni deka nyendiaka servis penerebai bilun ti likun, moden sereta ulih diandal komuniti ti bepanggai enggau RAS.

Nitih ku iya, armada ATR-600 ti baru deka ngenegap rentayan RAS nengah nyendia pengelantang, penyikar sereta pengulih pengawa ungkup kaul serantau ba Malaysia Timur.

“Pelasar ATR konsisten mandangka bilun ti engkeman ungkup operasyen kami lalu pengawa ngemanah ngagai siri –600 pemadu baru, nentuka kami uliuh terus nyendiaka penerebai bilun seraya nyendiaka AirBorneo ungkup pemansang timpuh panjai,” ku iya ba penerang, Hari Empat.

Berebak enggau nya, Tuai Pegawai Eksekutif ATR Nathalie Tarnaud Laude madah, pemutus AirBorneo meranak puku ba kededua ATR 72-600 enggau ATR 42-600 mandangka pengelebih sereta sereta fleksibiliti ATR ti engkeman ungkup operasyen serantau ti macham pemar.

"ATR 42-600, enggau penyikar sereta ungkus operasyen ti mit, chukup engkeman nangkup rentayan serantau ti nadai mayuh, lalu ATR 72-600 nyendiaka kapasiti lebih ba palan ti beguna.

“Kami temegah ati bekerejasama enggau ArBorneo ngenegap penerebai bilun ti ulih dipechaya ba selampur Borneo enggau rantau ti besai agi,” ku iya.

Sempekat tu mandangka pemujur besai ba transformasyen AirBorneo nyadi kompeni penerebai bilun enggi Perintah Sarawak enggau pengawa iya ba rentayan RAS iya nya servis mensia mayuh ti nyambung komuniti ke jauh ba selampur Sarawak, Sabah dan Labuan.

Diputus ba ujun taun 2025, penerang tu ngamat strategi maru armada timpu panjai AirBorneo nangkan Perintah Sarawak ngempu MASwings ba taun 2025 sereta meri nama baru ngagai AirBorneo.

AirBorneo diatu bejalaika lapan bilun ATR 72-500 ari MASwings, lalu bilun baru ATR siri –600 deka nyadi pugu operasyen RAS ti likun, sikar sereta tan agi ba Malaysia Timur.

Penumbuh bilun ATR 42-600 enggau ATR 72-600 disadang nambahka peneleba orang ke nepan, sereta pengulih servis enggau pengandal operaysen.

Bilun nya disikap sistem avionik moden, teknologi navigasyen moden sereta kabin ti lantang agi, kelimpah bisi pengulih nyaup operasyen pengangkut berubat nyengkaum dikena mai orang sakit meraka menua serantau enggau menua pesisir ba Borneo.

Pengawa ngena armada nya meri fleksibiliti ngagai AirBorneo ngambi nipak kapasiti nitih profil jalai.

Hak meli ke bukai mega ngerandang peluang ngerembai rentayan ba dudi hari, nyengkaum pengulih ngerembai ke servis ngagai rantau Kandang Pemansang ASEAN Timur-Brunei Darussalam-Indonesia-Malaysia-Filipina (BIMP-EAGA).-EDISI UKAS