SRI AMAN: Fasiliti lumba enggi perintah nengeri baka stadium enggau padang lumba meseti dikena manah, nyengkaum dibuka ungkup dikena raban sekula dikena nempa mayuh agi atlit bepenau ari renggat baruh.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, inisiatif strategik nya pengawa meranak puku timpuh panjai Perintah Sarawak ba pemansang lumba lebuh fasiliti betikas nengeri enda diteju pia aja tang mega nyadi palan latih ungkup nembiak.

“Perintah kitai diiring Gabungan Parti Sarawak (GPS) deka terus ngemanah fasiliti lumba kitai lalu tu ulih dikena sekula.

“Anang kitai numbuh stadium, tang enda dikena lalu rumput nyau panjai. Kitai numbuh stadium, awak sekula ulih ngena,” ku iya nyemetak.

Iya madah munyi nya lebuh bejaku ba Pengawa Nangguh SUKSAR IV 2026 Betong-Sri Aman ditu kena Hari Minggu.

Ku iya, fasiliti lumba ti digaga ngena agih belanja besai perintah nengeri meseti diakses sekula chara muntang lalu nadai ditetapka chaj ti nating nentuka latih enggau pemansang penau lumba ulih dipejalai chara konsisten.

“Anang netapka chaj kelalu tinggi, kena mih stadium enggau padang lumba kitai laban Perintah Sarawak ngabiska mayuh ungkup tuju tu.

“Nengeri bukai meseti nganti perintah besai, kitai ba Sarawak enda ibuh minta enggau nganti pen ngaga fasiliti lumba lalu aku semina minta fasiliti tu dikena,” terang iya. - EDISI UKAS

Pemberita : Jonnie Kiew
Gambar : Muhammad Rais Sanusi