SRI AMAN: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg keran atlit Sarawak ngembuan penau enggau besikap tumu ngetan gelar champion besai ba Lumba Malaysia (SUKMA) XXII Selangor 2026 bulan Ogos tu.
Ku iya, sempama anak Sarawak diengkah ba tasik nyadi pulau, diengkah ba darat nyadi bukit deka nunjukka anak nengeri tu ulih nempa pemujur taja bepadan ba kelang bukai.
“Kitai deka SUKMA baka nya mega (sempama), kitai ti deka nyadi ‘champion’, taja SUKMA ba Selangor, ukai ba Kuching, ukai ba Sarawak tang aram mih, ba Selangor pen kitai deka bebendar bepadan,” ku iya.
Iya madah munyi nya ba Pengawa Nangguh SUKSAR IV 2026 Betong-Sri Aman ditu, kena Hari Minggu.
Datuk Patinggi Abang Zohari madah, anak Sarawak bisi penau ti tinggi dalam lumba lalu sekeda nama besai baka‘Kilat Boy’, atlit nyemerai Sarawak enggau lumba main bol ti majak mansang diatu.
Ba edisyen sekali tu, pechut kepenudi Zon Utara mujur ngumpul midul nentuka sida nyadi champion besai SUKSAR IV 2026, seraya ngemuntan juluk Zon selatan ngetan gelar champion sida ba edisyen ti dulu.
Zon Utara mujur ngumpul 108 midul iya nya 39 midul emas, 37 midul pirak enggau 32 midul engkeraju.
Nangkan nya, Kenny Lim Zheng Xian ari kem ensikal Zon Selatan nyadi Olahragawan Harapan pengudah bulih empat midul emas seraya Nur Ain Ramadhania Abdullah ari kem ensikal Zon Barat nyadi Olahragawati Harapan pengudah bela bulih empat midul emas.
Sama datai, Menteri Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah, Sapit Menteri Nembiak, Lumba enggau Pemansang Orang Dagang ti mega Chairman SUKSAR IV 2026 Datuk Gerald Rentap Jabu, Sapit Menteri Pelajar, Inovasyen enggau Pemansang Penau Sarawak Datuk Francis Harden Hollis, bala Sapit Chairman Begulai SUKSAR IV 2026 Mahra Salleh enggau Datu Richard Michael Abunawas, Pemangku Direktor Kaunsil Lumba Nengeri Sarawak Khairul Nizam Morshidi sereta temuai dipebasa bukai. - EDISI UKAS
Pemberita : Jonnie Kiew
Gambar: Muhammad Rais Sanusi
