SIMANGGANG: Kontinjen Zon Utara diari ke Miri, Bintulu enggau Limbang mujur ngerampas baru gelar champion Lumba Sarawak (SUKSAR) IV 2026 ti tembu diatur di Sri Aman kena Hari Minggu.

Tu kedua kali Zon Utara bulih gelar champion pengudah edisyen keterubah SUKSAR ba Kuching ba taun 2017.

Dipasuk 227 atlit, kontinjen nya gah pengudah bulih 103 midul iya nya 39 midul emas, 37 midul pirak enggau 32 midul engkeraju ngambi bulih gelar champion.

Achara angkat berat nambah pemayuh mayuh midul emas zon nya iya nya 15 midul, jauh ngalah ke kontinjen bukai.

Seraya, achara karate nambah semilan midul emas dientudi ping pong enggau empat midul emas, lima emas bela ari achara taekwondo enggau ensikal gunung, kelimpah dua emas ari achara petanque.

Tinju, sepak takraw enggau sofbol bela nambah siti midul emas.

Champion sebedau tu, Zon Selatan ti digelih ba renggat kepenudi bulih penuduk kedua enggau 30 emas, 28 pirak enggau 24 engkeraju.

Taja pia, pemujur nya tetap ngemegah Zon Selatan pengudah mujur nguasa tiga achara iya nya taekwondo enggau semilan emas, tinju bulih lapan emasenggau ensikal bulih lima emas.

Achara petanque enggau sepak takraw bela nambah dua emas seraya achara karate, ensikal gunung, bola jaring enggau bola keranjang bela nambah siti emas.

Tuai rumah edisyen sekali tu, Zon Barat ba penuduk ketiga enggau bulih 19 emas, 14 pirak enggau 36 engkeraju.

Achara ensikal lumba ba jalai nambah midul pemadu mayuh kontinjen nya enggau lima emas, dientudi tiga emas bela nengah achara sepak takraw, ping pong enggau petanque.

Dua da emas ari achara angkat berat seraya siti emas bela ditambah nengah achara tinju, karate enggau taekwondo.

Nangkan nya, Zon Tengah ba penuduk keempat nengah 17 emas, 24 pirak enggau 34 engkeraju.

Achara angkat berat nambah midul pemadu mayuh kontinjen tu nengah tujuh emas, taekwondo enam emas, seraya karate dua emas.

Tinju enggau bola keranjang bela nambahka siti emas.

Nangkan nya, atllit ensikal Zon Selatan, Zhen Xiang Kenny Lim dipadu nyadi Olahragawan Harapan SUKSAR IV 2026 pengudah pemujur nya bulih empat midul emas.

Anugerah Olahragawati Harapan dipenggi atlit ensikal Zon Barat, Nu Ain Ramadhania Abdullah mega asil pemujur bulih empat midul emas.

Pengawa nutup SUKSAR IV 2026 udah dipenyadi Premier Sarawak, Datuk Patinggi Tan Sr (Dr) Abang Abdul Rahman Zohari Tun Datuk Abang Openg di Stadium Betutup, Kompleks Lumba Sri Aman kena Hari Minggu. - EDISI UKAS