Nano Satelit Ngemuntang Pengawa Survey & Pemansang Sarawak
BINTULU: Perintah Sarawak ngatur inisiatif nano satelit bansa cubesat dikena ngemuntang pengawa survei tanah enggau perambu pemansang dudi hari Sarawak.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, teknologi nano satelit diatu dipeda siti alternatif ti efisyen agi sereta beungkus efektif dikena ngulihka data geospatial terus ari dalam tanah.
Nitih ku iya, ungkus ngasil satelit konvensional ba Eropah dipelaba manggai entara Euro 300 juta nyentuk ngagai Euro 500 juta, lalu nano satelit nyengkaum cubesat semina berega entara Euro 500,000 ngagai Euro 700,000.
“Nengah teknologi tu, Sarawak ulih ngasilka nano satelit kediri ti deka nyaup pengawa ngaga kar enggau nyimpan data ba orbit baruh,” ku iya maya bejaku ba Program Landas Summit 2026 ditu, Hari Satu.
Premier madahka data ti diulih nengah nano satelit deka diguna dikena nambah perambu ekonomi enggau spatial nengeri, lebih agi ba kereja ngatur tanah, infrastruktur enggau pemansang meruan.
“Data tu deka nyaup pengawa survei tanah enggau jampat agi, betul sereta begempung, lalu nyengala ngayan ke gaya fizikal tanah Sarawak,” ku iya.
Iya mega muji tikas pemansang Opis Tanah enggau Survei Sarawak ba pengawa bekenaka teknologi enggau ngumpul data digital sereta ngemerat pemesai reti integrasyen entara sistem penerang tanah begempung enggau teknologi nano satelit.
Inisiatif nano satelit tu mega seriris enggau pengawa bekenaka data satelit ba sektor betanam betupi moden, industri bepelasar tinggi, ekonomi digital enggau perambu mengeri sereta menua pesisir, nengah strategi pemansang Sarawak 2030.
Nambah ke jaku iya, Premier madah, raban iya ransing deka meda Sarawak nyadi pemekuh teknologi satelit mit tu ba ASEAN lalu ngerandang peluang pansik, akademik sereta sektor peribit ungkup bekerejasama ba pemansang enggau aplikasyen teknologi nano satelit.
Pelin strategik Opis Tanah enggau Survei Sarawak 2026–2030, ti baru dipenyadi, bela nyerangkung inisiatif bekenaka teknologi ruang angkasa dikena ngerumban pengawa kar, nisih data enggau pemansang sistem penerang ti bekualiti agi.
Ba pengerami nya mega bela ngatur pengawa bejadi Balai Premier Sarawak ba Universiti Teknologi Malaysia nyadi kelai kaul strategik Perintah Nengeri enggau institusyen akademik ba bidang geospatial, 'penderiaan jauh' sereta teknologi ruang angkasa.
Sama datai Sapit Menteri Perambu Mengeri, Pengatur Tanah enggau Rampa Menua, Datuk Len Talif Salleh; Sapit Sekretari Perintah Sarawak (Administrasyen) Datu Felicia Tan Ya Hua, Sekretari Mendam Opis Menteri Pengeraja Asal enggau Pemansang Mengeri Datu Abdullah Julaihi, Residen Bagi Menua Bintulu Datu Nyurak Keti, Direktor Tanah enggau Survei Sarawak Datu Awang Zamhari Awang Mahmood sereta pemesai ke bukai.-EDISI UKAS
